Ka NPP Youth Wing hei miet ka 30 tarik u Khonchonglad (Nov) da pynskem ko yaka chnat krehkaam namo ka Unit ka Party ha Namdong-B heiwa da man ko kawa chongchit heiwa da em hadooh 100 ngut ki kynthai ki chynrang wa da mih chakhmat yow kreh chitom neibynta ka Election 2023 yow pynjop emburom biang ya u Sniawbhalang Dhar sa chisein.
Katkam i klam wai phang na u President kani ka Unit, u Dameki Siangshai da ong u wa ki chngaaiñ wei em kyrmen ki khynroo ka chnong Namdong-B wa yoo ki wa ha kani ka seiñ khynroo yong ka 1-Nartiang NPP Youth Wing wa em kiwa chemphang ha ki kaam ka imlang sahlang neibhah wa yoh ko ya kiwa kitkaam wa da tip da stat ha ka Politics wei ngait skem u deiwa ya krehlang chirup wa ki chnat kynroo yong ki chnong waroh yong ka 1-Nartiang Constituency u wanrah ki yei kylla ha kini ki 5 snem wa daw wan.
Neiliang won u dkhot ka Youth Wing ka Block, u Rikio Shylla da ong u wa ka Namdong wa ka thaaiñ hi cheini waroh da man ki ki chnong kiwa da yoh yei kyrkhu ha kini ki sngi heiwa u MLA yong i u Sniawbhalang Dhar da wai u yaka C&RD Block wei da pynku kyrdan leh yaka PHC cha ka CHC ha chnong Namdong-B, wei ini toh i angnood ki paidbah ka thaaiñ da ki phaw phaw snem wa da mankaam ki ha kani ka kynti.
Da ong u leh wa ini pynyoo ko wa u MLA yong i ym em chong klikti u tangwa da kreh chitom u wei da ye u wow wanrah ya kini ki kaam pynroi hapoh ka Constituency yong i.
“U ong O ha kani ka kynti ka seiñ khynroo u lai ko chakhmat wow pait sakhiat yaka imlang sahlang haka Constituency waroh kawi neibynta ki khynroo. Ngait O leh wa ki paidbah yong kani ka thaaiñ u pynyoo ki yei sñiawngooh yong ki yei kaam wa dadep leh u MLA yong ki deiwa e ki yei kyrchaan wa pura ya u Sniawbhalang ha kani ka Election 2023 yow pynjop emburom biang ya oo,” da ong u Rikio.
Yei pynskem ya ka Unit da leh da u President ka Youth Wing ka Block Nartiang, u Dame Dhar kiwa man kamni ha wah:
President- Dameki Siangshai
Vice President- Dameki Ksoo
Secretary- Basedlin Sungoh
Assitant Secretary- Kitbok Lamare
