Ka Election Commission of India (ECI) ha ka 18 tarik uni u bnai da pynbna ko ya ki tarik wa emkaam heiyatoh wa ka Election MLA yong ki le tylli ki jylla kiwa kynthup ya ka Tripura, ka Nagaland wa ka Meghalaya.
Heiyatoh wa kani ka Election, ynne ka sngi hapoh i yahkhmat u Deputy Commissioner ka West Jaiñtia Hills, u BS Sohliya chirup wa u Superintendent of Police, u Bikram D Marak kamjooh u S. Chauhan uwa man u Adhoc Commandant ka SSB Camp, West Jaiñtia Hills da hiar ki cha ki Polling Station wa em ha ki le chnong ka District wow pynsñiawthooh ya ki BLO wa ki waheh chnong wa kiwa kitkaam chnong neibynta kammon wow pynkhreh ya ka Election ha uni u snem.
Kini ki chnong kynthup ki ya ka Lapangap, Khanduli wa Saitsama.
Ha ini i sylli wei pynsñiawthooh, neiliang u Sohliya da kylli takit u ya ki BLO heiyatoh wa i pynkhreh wow thap Vote neibynta ki bru kiwa kyrpang (kiwa em i duna hei doh i pran) kamjooh leh kiwa da em palat 80 snem i rta heiwa kammon u ye ki wow wan thap Vote wei kammon u pynkhreh neibynta yong ki.
Heijooh i por u Sohliya da phah u leh wow chna ya ka Ramp cha ki Polling Station neibynta ki bru wa kyrpang kiwa hap pynchong ha ki chuki chaka namo ki Wheelchair wa kiwi kiwi.
Heijooh i por da takit u leh yei em bordiñ wa ki paikhana khnang wow suk kiwa kreh heipor Election wei ha ki thaw wym biang kini daw phah pynkhreh u ha ki sahep kiwa em hapoh yong oo.
Da e kti leh ya ka chithi cha ki waheh chnong wa thoh ya ki kyndon Election katkam wa da booh ka ECI.
