Shillong: Hadien wa da khang smam yaka Iewduh kattu la kamwa 3 bnai, ynne ka sngi neiliang u Symbood Montri Rangbah, u Prestone Tynsong deilang waki Montri ka sorkar jylla da lai sylli ki ya kani ka yaw, chwa waka sorkar u chim ya i rai wa hoi næ ym hoi u wai noh yaka Iewduh.
Kam wow kdaw heini wa ka sorkar da rai ko wow khang chwa yaka Iewduh hadien wa ya syllok waka KHADC kamjooh waka Hima Mylliem kiwa da pynlai yaka yaw, wei rap hadien neiliang ka KHADC waka Hima Mylliem da e yumut ki cha ka sorkar wow wai noh kajiak kamwa leh ha kiwi ki bynta yong ka sor. Chooh chooh neiliang ka sorkar leh da pynbna ko wow yang chwa hadooh wa liwan lut ki bru kiwa sahkut cha baar jylla. Ha kini ki kajiak sngi da em leh i pynbor neiliang ki mahajon wa jooh khayi ha Iewduh yaka sorkar wow wai noh ya katai ka yaw.
Ha ini i lai lai sylli da emlang leh da u Montri ka chnat i chait i khiah, u AL Hek, u Montri kaam pynroi sor, u Hamletson Dohling, u DHS Dr. Aman War, ka Deputy Commissioner, ka Matsiewdor War Nongbri, u CEM ka KHADC, u Titosstarwell Chyne wa u Acting Syiem ka Hima Mylliem, u Ainam Manik Syiem.
U Prestone da ong u wa i lai sylli ka sorkar toh wa kwah ko wow e laad u wai noh yaka Iewduh neibynta i bha i miat kiwa chong yaw kiwa da dooh yaka kamai yong ki neidaw i khang chnong wow yada nei poor u khñiang COVID-19, wei da ong won wa ka sorkar daw bichaar bniah biang ya ini hachwa wow pynmih yaka rai.
Da ong u wa ka sorkar kwah ko wow wai noh yaka Iewduh, tangwa deilang waki kyndon kiwa pynrkhiñ yong ka chnat i chait i khiah, wow lait na iwon iwon i maa na i chah ktah lada wai noh yaka Iewduh.
Ha i lai sylli hapoh ka Iewduh da sakhi wa lyngam kiaw kiaw, tangwa cha lait soodong yong ka da sakhi leh wa awjan waroh ki dukan da wai lut ki wei khynnia khlem da bood yaki kyndon næ kohngooh ya iwa phah. Hawa kylli, u Prestong da ong u wa i khang u man bait i du hapoh ka Iewduh katwa kiwa em cha baar ka Iewduh ye ki wow wai kamwa da pynbna wei phah daka sorkar.
U CEM ka KHADC, u Titos Chyne da ong u wa ka Council da dep e yumut ko cha ka sorkar wow wai noh du da ki ‘Odd’ næ ‘Even’ Number kamwa leh haka thaaiñ Khyndailad.
Neiliang ka Hima Mylliem, da pyntip ki wa da phah ya iwa e yumut cha ka sorkar wow wai noh yaka Iewduh du kamwa 30% man ka sngi yow lait nei khynnia palat, khnang wa ki paidbah u ye ki wow bood ya ki kyndon kamwa da phah da ka sorkar.
Daw phah khang syndon ka DC ya ki dukan wym bood yaki kyndon ha khap Iewduh
Ka Deputy Commissioner yong ka East Khasi Hills, ka Matsiewdor War da maham wei phah khang noh ko ya waroh ki dukan kiwa em ha khap yong ka Iewduh neidaw wa da tyngkheiñ ya ki kyndon wa da phah, wei i khang ya kini ki dukan u man ko hadooh wa da pyndam yaka Lockdown.
Hawa kylli wa lada e laad wow wai yaka Iewduh wa lada daw man ko kamjooh, ka DC da ong ko wa neiliang ka sorkar daw phah ko yaka Standard Operating Procedures (SOP) cha ka Hima Mylliem neibhah wa haap hapoh i pynlai yong ka Hima.
