Lai tia ki Muster Roll cha ki ar ngut ki EE ka PHE hadien wym bood ki yaka hukum sorkar

Hadien wa ka Chief Engineer yong ka chnat PHE ka sorkar jylla ym ap ko yaki mat dawa yong ka seiñ kiwa kreh Muster Roll, wot hadien wa neiliang ka seiñ dadep yaklam wei e ko dei thoh haroh nadooh ka 27-09-23 hajrong soo tylli ki mat dawa, kamtæ ynne ka sngi neiliang kiwa kreh Muster Roll yong ka chnat PHE wa haap hapoh ka lama yong ka All Jaiñtia Muster Roll Workers & Labour Union Central Executive Committee Headquarter Jowai, da lai tia ki cha ka yung krehkkam ki ar ngut ki Executive Engineer ha Jowai wa kynthup yong ka Rural Water Supply wa yong ka Electrical Division.

Heini i lai li tia da kbai wei rah Placard haroh ki yaki mat dawa yong ki wa kynthup u pynyoh yaka tulop wa sahteiñ najrong wow su man-u-bnai, wow pynkrehkaam yaka Regular Casual, wow e laad ya kiwa kreh u pynpsiah pyrtuid ki ya idæ hapoh ka Meghalaya Building and Other Construction Workers Welfare Board kamwa ki leh em hok ki, najrong wow pynku kyrdan yaki Unskilled cha ka Semi Skilled ya kitu kiwa da palat 5 snem wa kreh ki kamwa hukum da ka aiñ.

Hadien i yachem ki wa kini ki ar ngut ki Executive Engineer wa kynthup yong ka Rural Water Supply ka R. Kynjing wa u Electrical Division, u Paul Synnah, neiliang u Adviser yong ka seiñ Muster Roll, u K.L. Pariat ong u, heiyatoh waka tulop i sakhiat hi ka chnat Finance yong ka sorkar da hukum ko wa toh u su man-u-bnai cha ki Muster Roll, najrong wot u Montri Rangbah, u Conrad Sangma leh da dep pynbna paidbah u wa 3 bnai ka poisa da pynlait chwa yaka tulop yong ki Muster Roll khnang yow lait ki nei saja.

Heiyatoh won waka Regular Casual Worker ong u, kiwi won ki chnat krehkaam da pynkrehkaam ki neibynta kitu kiwa da kreh palat 10 snem, katwa ha PHE won ym em pynkrehkaam ki wot hawa ka sorkar da e hukum ko nadooh u snem 1996.

Related posts

Hapoh dorbar ym lait ki tang u ang tangwa cha lait pynheh ki kam ki rem dorbar pynksan cha baar, ong u Titos ya ka EC ka VPP

June 26, 2025

Wanrah i ka mang tangka kawa boon dei yoh yei lut | Da pyndam leh ya ki Committee wa pynlut phut: VPP

June 24, 2025

Wei hajrong kini ki yurim da booh yukylli haroh u yaka Chief Engineer deiwa ong, “Ini pynyoo wa toh hi mo wa yoobeiñ ko ya kiwa kreh Muster Roll namo yaka hukum ka sorkar jylla?”

Neitæ da dawa haroh ki wow pynku kyrdan naka Unskilled cha ka Semi Skilled ya kiwa kreh wa da palat 5 snem chaneiñ kamwa hukum daka aiñ nadooh u 2017.

Hakhmat kini ki ar ngut ki Executive Engineer ka seiñ da ong haroh ko wa toh u e laad ki ya kiwa kreh Muster Roll wow pynpsiah pyrtuid ki ya idæ hapoh ka Meghalaya Building and Other Construction Welfare Board khnang wow yoh myntoi ki kamwa ki leh toh hok hi u pynpsiah pyrtuid ki.

Kamtæ heiyatoh waka tulop wa sahteiñ yong u bnai September, October wa November da e por ki yaka sorkar wow su chwa ka Christmas wei la jia wym su ko hapoh 17 tarik uni u bnai, waroh kiwa kreh Muster Roll na kylleiñ ka jylla daw ya mih chong kyllaiñ myngngor ki ha Shillong haka 18 tarik uni u bnai.

Heijooh i por u K.L. Pariat da pynkynmoo haroh u yei chah ktah kiwa kreh Muster Roll kam haka chnat Sericulture wa la 6 bnai ympu em yoh tulop ki wei ha Water Resources won la 8 bnai ympu em yoh tulop ki.