Kiwa chong dukan ha Ïewduh ynne ka sngi da lai toor ki cha thanat ki pulit u Syiem ka Hima Mylliem, wei ini i toor yong kiwa chong yaw toh yow dawa wai waroh ki dukan deiwa pynlai da Odd wa Even Number. Wei ini i dawa yong kiwa chong yaw toh hadien wa ka sorkar lyngba ki bor pynlai District ka East Khasi Hills da pynbna wow phah khang chwa chipor ya kattu kattni ki jait dukan ha nongbah Shillong wa kynthup ha Ïewduh.
Hadien wa yoh yutip ya ini i dawa yong kiwa chong yaw, neiliang ki bor pynlai District da lai ki cha thanat Syiem wow pynsñiawthooh ya ki paidbah, wei neiliang ka ADC ka B. Rani da pynche ko wa i khang ya ki dukan u man ko neibynta chipor, heiwa ki bor District daw pait chwa ki ha kini ki chi sngi ar sngi, deiwa ong leh wa ini i pynbait yong ka sorkar boi daw em i pynkylla.
Da kyntu ko leh ya kiwa chong dukan ha Ïewduh wow yai chah ki chipor wa ini wa pynbait ka sorkar, neibhah wa ym ye wow wai ya ka yaw deiwa khynnia, deiwa ong leh wa daw pynsñiaw leh cha kiwa haneiñ ya i dawa wow e laad wai ki dukan da ki Odd wa Even Number neibynta wow yoh wai lang waroh ki dukan.
Neiliang kiwa chong dukan ha Ïewduh da pynsñiaw ki yei dooh nong neidaw wa chah phah khang boon tylli ki dukan khamtam ki dukan wa chong madan.
U Montri ka Hima Mylliem, u MB Kharlukhi da kyntu u ya kiwa chong yaw wow yaichah chipor wa ki bor pynlai neibhah ym kwah de wow khang ya ka Ïewduh kamwa da leh ha u snem wa da dep, heiwa da kular u wa ka Hima daw pait ya iwa bha tam neibynta ki paidbah.