Jowai: Ki warep wa ki waheh chnong ki 9 tylli ki chnong kiwa haap hapoh ka Thadlaskein Block, West Jaiñtia Hills District, hapoh i yahkhmat u Jimmy Raul Kharmuti, Programme Coordinator, FARM, Northeast (JHDS) wa u Mutshwa Thabah, President ka People’s Welfare and Development Society (PWDS) da lai yachem ki ya u montri ka rep ka riang, u Banteidor Lyngdoh wei da li e dorkhat hajrong i eh i khoo ki warep khamtam wa yatoh wa i dor ki mar rep mar riang.
Ha ini i yachem da yoh ki warep wow phyllu yumut wa u montri wow khana ha oo ya waroh i chitom wa chem ki khamtam i hiar dor u sapdok wa u syiñ kiwa da mih bha wei da mih won i chah ksih dor iwa da ktah ya ki warep hadooh kattæ kattæ kiwa chaniah ha ka rep yow im ja ki man ka sngi. I hiar dor u sapdok da poi hadooh T.2 wa T. 3 chi kilo wei u syiñ won da hiar u hadooh T. 5 wa T. 8 chi kilo ha kini ki bnai iwa da pynkthang mynsien hadooh kattæ kattæ ya ki warep.
U Jimmy Raul Kharmuti da ong u wa emkaam wa ka sorkar wow leh smat ko wow booh ya u sapdok wa u syiñ ha ka Crop Insurance wa ka Marketing Plan Policy wow yarap wow pynku ya ki warep yong kani ka thaaiñ wa ka jylla waroh kawi, neibhah ka rep ka riang man ko u budloom yong ka yoh ka kot ka jylla waroh kawi khamtam hadien wa khang noh wow tih mooyong da ka NGT.
Neiliang u Mutshwa Thabah leh da ong u wa neipor cheipor ka sorkar da pynchlur ko ya ki warep khamtam ya ki khon khynroo khyllood kiwa ym em khih em khan wow chimkhia ki ya ka rep ka riang, tangwa kamwa man kattæ i hiar dor ki mar rep da pyndooh mynsien ki chiboon ya ki khynroo khyllood wa chimkhia ya kani ka kaam.
Neiliang u montri da kular u wow chimkhia wei wow boodien ya kani ka kaam wa da pynkit ha ki warep wei ka sorkar leh u emlang ko yow man kani ka kaam kawa jop. Wei da kular u leh waka sorkar daw wanrah ko ya ka Policy namo i rukom krehkaam wa kyrpang neibynta ka rep ka riang .
Neiliang ki warep da e khublei kyrpang ki ya u montri uwa da kular wow chimkhia wow pait yei eh i khoo yong ki.
Discussion about this post