Ka kyrtong MP ka NPP na Shillong Parliamentary Constituency, ka Dr. Ampareen Lyngdoh ynne da pynman ko yaka yalang yong ka ha Sutnga Saipung Block ha Jalaphet, East Jaiñtia Hills heiwa da emlang u Symbood Montri Rangbah ka jylla, u Sniawbhalang Dhar, ka MLA ka Sutnga Saipung, ka Santa Mary Shylla, u MLA ka Jowai, u Wailadmiki Shylla, ki MDC ka NPP wa kiwi kiwi.
Ka Santa Mary Shylla hawa e i klam da ong ko wa kani ka Constituency toh kawa chitom bha ha ka luti syngkieñ ha kylleiñ ki chnong.
Da ong ko wa kani ka Election da boon i pynbaad yaka NPP khamtam da ka VPP heiwa da man kamwa klam biej ki wei kopsar ym hun ki yei e ka sorkar MDA ha ki Constituency yong ki.
Chooh chooh da ong ko wa emkaam u yasaaid yeiwa chah pynbaad ka NPP wei ymtoh u chah yahbakla deiwa pynbiej ya ki paidbah.
Da ong ko leh wa kamwa da pynjop ya ka na Sutnga Saipung emkaam leh u pynjop ya ka manbei na Shillong Constituency deiwa kyntu ya ki manbei manpa wow kyrchaan ya ka Dr. Ampareen.
U Wailadmiki Shylla kam u Working President ka Party da ong u wa hadien ka Election MP ha u 2019 ym kwah de u wow kreh ha ka Election MP wow wan neibhah da u kyrtong ka MDA leh dang rem u kamtæ manda poi ha u 2023 manda yoo u wa pynrem ka Santa Mary ya u MP ha ka Election MLA kamtæ da rai u wow kreh biang ha kani ka Election.
Da ong u wa ha ki san snem wa da lai da jooh klam u heiyatoh wa ki luti syngkieñ ha East Jaiñtia Hills, wei lada jied yaka Congress tæ daw pyndooh mynsien i ya kiwa boon neibhah wa emkaam yaka bru wow booddien ya ki Scheme na ka sorkar pyrdi.
Chooh chooh da ong u wa da em ki MLA wa ki MDC ka NPP kiwa da kreh khlem chong neibynta ka kyrtong ka Party.
Heiyatoh wa u Prah da ong u wa u heh ka Party ha u 2016 da kwah u wow pyndam yaka District Council deiwa wanrah ya ka Article 371 wow pynman ya ka jylla kam ka Union Territory iwa mut wow pyndooh yei mantre ya ki thaw yong i.
Ka Dr. Ampareen kam ka kyrtong MP da e khublei ko ya ki paidbah wa da phah ki da ka manbei cha Assembly kawa da pynrem ya ki bru waheh wei da wanrah ko chiboon ki mat yaklam ha ka Dorbar Chna Aiñ.
Da ong ko wa ki MP toh ki wow krehlang chirup wa ki Dolloi, ki Waheh Chnong wa kiwi kiwi neibhah boon ki Scheme wa wan na ka sorkar pyrdi wei emkaam u yoh u yaklam ya kini ha Parliament.
Chooh chooh da kular ko wow kreh chitom wow wanrah ya i bha i miat ya ki paidbah.
Heijooh i por da ong ko wa nachwa jooh em ko ha ka Congress wei da mih noh ko na ka neibhah wa yoo ko wa ymye de kani ka Party wow kreh ya ki paidbah.
Da ong ko leh wa ka VPP da kwah ko wow khang noh yaka NEHU wei lada kamtæ cheiwon u lai puræ ki khynnah khynroo khyllood ka jylla, da kwah ko leh wow khang yaka NEIGRIHMS lada kamtæ cheiwon u phah sumaar ki paidbah hawa kamtæ cheiwon itæ i kylla wa kwah ki u wanrah.
Da ong ko wa daw booddien ko ya ki Scheme wa paan ka sorkar jylla na ka sorkar pyrdi wei ha ki por wa dadep da chem chitom bha neibhah wa u MP em u ha ka Liang Pyrchah kamtæ lada jied ki paidbah ka Sutnga Saipung yaka Santa Mary kam ka MLA ym man iwa eh ya ki wow jied ya ka kam ka MP.
Heijooh i por da ong ko leh wa daw sah ko cheini myntu khnang wow tip wow sñiawthooh yei eh i chon ki paidbah ka thaaiñ.
U Sniawbhalang Dhar da ong u wa ka NPP da jied ko ya kani ka manbei wow man kam ka kyrtong MP neibhah da yoo ko wa chynna jngai wei man ko kawa sñiawkhia.
Da ong u wa ka Congress man ko kam ka Bus wa khlem chaka wei katni em ko hapoh ICU.
Da ong u leh wa u Narendra Modi da tikna ha chi tyllup ka pyrthai wei da tip wa daw jop ka BJP hadooh 380-390 ngut wei ka NDA daw jop ko 400 ngut ki MP.
U Sniawbhalang da ong u leh wa ka Dr. Ampareen man ko ka bru wa biang dooh wow ksoh ya i kyrdan MP.
Chooh chooh da ong u wa u President ka VPP da ong u wa ym emkaam yaka NEHU waka NEIGRIHMS wei i chait i khiah man iwa emkaam bha tæ lada pyndooh ya ki kammon u jia ya ki paidbah.
Da kyntu u ya ki paidbah wow kyrchaan yaka Ampareen wow man kam ka MP ha kani ka kynti khnang wow pynneh yei burom ka Sant Mary kawa da pynjop ki kam ka MLA na ka thaaiñ.
Heijooh i por da ong u wa i chah pynbaad wa mih har rukom wa baam tooh i wei lada kamtæ kammon u jop i la soo sien.
Kam kani ka yalang da pynman leh ha Khliehriat West Community Hall neibynta ka NPP 6-Khliehriat Block heiwa yaka yalang da pynlai da u MDC, u Phasmon Dkhar hei emlang kiwi ki MDC kam u Lakhon Dkhar, u Eveningstar Teron, u Seiborlang Shadap wa u Dr. Sankey Shangpung.
U Seiborlang Shadap hawa e i klam da ong u wa ka Party da yahkhmat ko yaka jylla wei emkaam u kyruiñ cha kani ka Party wow pynpoi ya ki kaam pynroi ha ka jylla.
Da ong u wa u Vincent Pala heipor wa jop nyngkong u da man u kam u Montri Khynnah wei ha ki ar sien won da chong u ha ka Liang Pyrchah wei neidaw wa em ka NPP ha ka sorkar MDA emkaam u kyrchaan yaka NPP ha kani ka MP leh.
Discussion about this post