U Montri Rangbah ka jylla uwa man leh u heh ka NPP, u Conrad K Sangma ynne da lai yalap u ha Rajabala Constituency wow paan ya ki Vote ki paidbah neibynta i roi i paar, deiwa ong wa ki bru ymtoh u pynyaphær ki iwi ya iwi na i man jaitbru tangwa emkaam wow jied ya ki bru wa ye u wanrah ya i roi i paar.
Ynne u Conrad da lai yalap u ha Takimagre kawa haap hapoh ka Rajabala Constituency wei da neh u ha Ri-loom Garo kam ha chnong Bhajamara nadooh ynnin wow paan kyrchaan ya u kyrtong ka NPP, u Abdus Saleh.
Ha ka Election chiteiñ samoi ka wow man ha ka 30 tarik uni u bnai da em san ngut ki kyrtong wa yakhun na kani ka Constituency.
U Conrad Sangma da ban u wa ka NPP daw jop ko wei ymtoh u em i yaphær jaitbru heipor wa man Election wei emkaam u Vote ya ka Party wa da seiñdur da u PA Sangma.
Neiliang u Abdus Saleh da ong u wa ki liang pyrchah tieñ ki katwa kamtæ da khut ki ya oo kam uwa na baar (Outsider) na thor ka Rajabala Constituency.
Da ong u wa oo ymtoh uwa pynyaphær jaitbru neibhah da jooh man u kam u Montri ka sorkar jylla wei u kreh bait u neibynta ki paidbah.
Ha kani ka sngi da pdiang leh ya u heh ka UDP u Aikos Momin cha ka NPP da u Conrad K Sangma wa u Abdus Saleh.
