Ka Khasi Students’ Union (KSU) East Jaiñtia Hills District Unit da pynsñiaw ko yei sñiawkhia wei da kdaw ko leh yei maa wa da yang chwa ha kiwa boon ki liang nei thmu yong ka Shree Cement Pvt. Ltd. wow booh ya ka karkhana pynmih khyndaw-bilat ha Elaka Nongkhlieh.
Yeini da ong da kiwa yahkhmat ka KSU kiwa da pynsñiaw cha ka Fact-Finding Committee kawa da thung da ka sorkar yow takit wei wow ap u sñiaw yeiwa ong ki paidbah heiyatoh iwa jia hadooh ka sngi wa pynman Public Hearing yow booh ya ka karkhana ka Shree Cement Ltd.
U Pynshaikupar Dkhar uwa man u Asst. Secretary ka KSU, East Jaiñtia Hills District, da ong u wa ka seiñ da pynsñiaw bait ko ha ka Committee yei chah ktah wei chah pynsih i thaw i bhaw heiwa ki da yaklam bait ki thij hajrong ki le bynta kawi toh ka Environmental Impact Assessment (EIA) kawa yoo kulmar, kawi toh hajrong i chah ktah ki krem kiwa em ha katai ka thaaiñ wa yajan wa ka thaw wa thmu tih moochuni da ka Shree Cement, wei kamjooh leh em ka krem kawa pynemkaam da u Kiang Nangbah wow rieh heipor wa yakhun wa ki pharæng.
Da ong u wa neiliang ka KSU da kyrpaad ko leh ya ka Committee wow pynneh ya ki moopynyieñ kiwa em ha Lum Thad Syiem ha chnong Tongseng deiwa dawa leh na ka sorkar wow pynbna ko ya kitai ki thaw kiwa emkaam wow yada kyrpang neibha wa em ki yei parom yongrim.
Hawa kylli, u Pynshaikupar da ong u wa ka seiñ ym em yaklam ko iyi iyi leh yeiwa jia ha ka 31 tarik u July neibhah wa da lai da kawi ka luti yong ka aiñ cha Crime Branch, wei daw pait iyi wow mih na kani ka Committee hajrong i pynsñiaw yong ka seiñ.
Discussion about this post