U montri rangbah ka jylla, u Conrad K. Sangma ynne da lai pait u ya ki yung wa daw pynkrehkaam chipor kam ki Corona Care Centre ha Shillong heiwa ka sorkar da jied ko le tylli kam kini ki thaw.
Ka Basic Training Centre ha Malki ye ko u pdiang ym duna ya 100 pyllong, ka Industrial Training Institute ha Rynjah u man ko kam ka Corona Care Centre wow pdiang ya ki chynrang wa ki kynthai kiwa chah ktah ha u COVID-19 heiwa daw ye ko u pdiang hadooh 45 pyllong wa ka District Commerce and Industries Centre ha Nongrim Hills ka wow em 60 pyllong.
Waroh kini ki le thaw ye leh wow pynboon ya ki pyllong lada dawa i kaam hadien.
Kini ki Corona Care Centre u em ki ya ki Oxygen Cylinder wa Concentrator wow pyndap yei emkaam kiwa thiah kjut.
Neiliang u Conrad da phah u leh ya ki bor wow leh yeiwa emkaam wow pynbiang ya ki tiar wa ki wakreh ha ki.
Ha kani ka sngi u Conrad da yaklam u leh wa ki Deputy Commissioner lyngba ka Video Conference heiwa da pynchlur wow pynkhlan ya i e tika ya ki paidbah deiwa jied ya ki thaw wei wow thooh leh ya ki laad ki luti kamjooh leh wow pynkhlan ya i kreh ha ki bor chnong.
Da ong u wa i e tika toh kawi na ki laad wow ye bha u yakhun pyrchah ya ka khlam COVID deiwa kyntu ya ki bor District wow booh da ka thong wei wow pynkhlan ya i e tika.
