Bataw: Ka FKJGP Bataw Unit, ynne ka sngi da leh warom ko yei dap chi snem næ ka “1st Office Bearer Term Celebration Cum Swearing in Ceremony’’ ya samoi krehkaam ka seiñ nadooh u snem 2012-15 waka ka i kular ya ki 12 ngut ki dkhot thymme nei bynta i samoi krehkaam kawa hadooh u Naichiphaw 2018.
Yeini, i leh burom da pynhap nongrim hajrong ka phang “Ka jingshakri para briew dei ka jingshakri ia U Blei” yeiwa da pynman ha yung yong ka Educational Training Centre hei emlang chirup u ma u ma Justine Dkhar MLA ka 6 Khliehriat Constituency kam u kongsan, u J.Marwein President FKJGP Central Body Shillong da man u kam u symbood kongsan, u ma JR.Pyrtuh MDC 7 Bataw-Lakadong Constituency, ki nongchong chnong waki dkhot ka seiñ.
Hachwa wow chim kti ki dkhot thymme nei bynta ka samoi krehkaam yong u snem 2018, u ma Justine Dkhar MLA 6 Khliehriat Constituency, da wai pyrda u yaka e sikai mynkna kawa tip kam ka “Free Coaching Class, Educational Training Centre” kawa hap hapoh i peit i yoo ka FKJGP Unit Bataw, heijooh i por da saam u leh 22 tylli ki thad kymmor (blanket) cha ki tymmen yong kani ka chnong kiwa da thied da ka FKJGP Bataw Unit East Jaintia Hills District.
U ma D. Sumer President FKJGP Bataw Unit, da batai u chaphang i samoi krehkaam ka seiñ nadooh u snem 2012-15, heiwa da ong u wa, ka Education Cell toh kawi naki tnad krehkam yong ka seiñ kawa kam ka Unit booh ki hakhmat dooh kam ka mat krehkaam ka seiñ. Ka thaw pure kot næ ka shlem e sikai chaphang i nang i tip kawa tip kam ka “Education Training Centre Bataw”, ya kani ka thaw pure kot da wai pyrda nadooh ka 5 Naiynñiaw 2014. I thmu iwa kongsan kam ka FKJGP-Bataw Unit ya kani ka thaw pure kot toh wow saam yei nang i stad cha kitu ki bru ki wym pu em u tip u thoh u pure khlem iwon iwon su lait noh ka bai pynpsiah pyrtuid (Registration form) kawa T. 100. Kani ka Centre em ko kawi ka nongsikai kawa yoh tulop kamwa T. 12,000 chi snem.
Yei kular ki 12 ngut ki dkhot thymme yong ka seiñ kam ka Unit da leh da u bah J.Marwein, President, Central Body Shillong.
Ki nongkitkaam wa thymme man ki u Deihok Sumer kam u President, u Mathew Pajat kam u Vice President, u Ampli Rupsi kam u General Secretry, u Niyoo Suchen kam u Joint Secretary, u Aris Suchiang kam u Education Secretary, u Alwain Suchen kam u Chief Organiser Secretary, u Kwelling Suchiang kam u Socio-Economy Secretary, Shibor Rupsi kam Disciplinary Secretary, u Kmenlang Suchen kam u Information Secretary, u Silas Pajat kam u Cultural Secretary, u Kerlang Suchiang kam u Environment Secretary wa u Deibor Lyngdoh kam u Sports Secretary. Heijooh i por u bah J.Marwein da pynlait paidbah u yaka kot mat krehkaam yong ka Excecutive Committee kawa nyngkong kawa nadooh u snem 2012 hadooh u snem 2015.
Ha kani ka sngi u ma Justine Dkhar, da saam u ya ki khusnam cha ki 3 ngut ki khynnah skur kiwa hap hapoh ka Lower Primary school kiwa kynthup yaka Da-emidaka Suchiang, ka Da-ebiangmi Suchen waka Ebiangmika Rupsi kiwa da yachim bynta ha ka Quiz Competition kawa da pynlai da ka Education Cell kawa ka dep man ha ka 30 tarik uni u bnai.
U ma Justine Dkhar kam u kongsan, hei klam da yaroh u ya ka FKJGP Bataw Unit, nei bynta ki kaam wa bha yong ka nei bynta ki paidbah, kyntu u ya ka FKJGP Batwa Unit wow pyllum pyllang ko ya ki khynroo puræ kiwa da pass ya ki eksamin kam ka SSLC waka HSLC yow e sikai u pynda oo hi ha kani ka Centre, hei yatoh wei kammon u pyndap ya ki form thoohkaam, neibhah ong uwa boon na ki khynroo puræ khamtam na ki thaiñ nongkyndong kiwa wan cha ophis u, chem u wa boon na ki duna i stat i tip ki hei yatoh wa kammon u pyndap ya ki standard form, katwa kamtæ neiliang yong oo kular u wow wan ha kani ka Centre yow e sikai ya ki khon khynroo ha kani ka Centre.
Ha kani ka sngi ia ka yalang da pynlai da u ma Tuesday Lytep President FKJGP,JHDU Jowai, pynbood dei klam tbian na u ma JR.Pyrtuh MDC 7 Bataw-Lakadong Constituency, u ma Marshall Biam Chairman NEIPE wa u ma DL. Rymbai Ex.President JYF Central Body uwa klam hajrong ka phang, da pynkut ya ka yalang dei kyntien e khublei na u ma Ampli Rupsi General Secretary FKJGP Bataw Unit.
Discussion about this post