U Montri Rangbah ka jylla, u Conrad Kongal Sangma da ong u wa ka sorkar jylla daw booddien ko wow pynmankaam ya ka Central Agricultural University (CAU) ha ka jylla, wei katkam wa man katni ka sorkar pyrdi dang bichaar bniah ko yeini.
Ynne ka sngi neiliang ka MLA ka East Shillong, ka Dr. M. Ampareen Lyngdoh da kylli ko hapoh ka Yung Dorbar Chna aiñ hajrong i e thaw wow chna ya ka CAU ha Kyrdemkulai, Ri Bhoi District, kawa da paan pynche leh hajrong i mang poisa ka sorkar India neibynta wow chna ya kani ka skurbah.
Neiliang u Conrad da pyntip u wa ka yung krehlaam ka Deputy Commissioner ka Ri Bhoi District da pynlait ko T. 5,49,66,115 hapyrdi u snem 2010 hadooh 2012 neibynta ka bai thaw.
Katkam wa ong u Conrad, da ong u wa i thmu wow booh ya ka CAU, ka sorkar India da pynemkaam ko katni wow pynlai ya ka College of Agriculture kawa yakrehlang wa ka Central Agricultural University na Imphal.
Da pyntip u leh wa ka sorkar jylla ha ka 7 Thohlakhmi 2005 da ekti ko ya i thaw ka MeECL iwa heh kamwa 18 Acre ha Pohktieh, Umiam, cha ka CAU, Imphal wow booh ya ka College of Post Graduate Studies for Agricultural Sciences.
Hawa jubab yeiwa pynrap kylli, u Conrad da pyntip u wa dadep e cha ka CAU T.45.44 klur neibynta wow chna ya ka University.
Da pyntip chooh chooh u wa i dawa ya ka CAU ha ka jylla toh nadooh u snem 2008, wei i pynkhreh da lai i chaphrang nadooh itu i por wei ha u snem 2010 u Secretary ka ICAR da mynjur u ya i thaw wa thmu wow chna ya ka CAU, wei ha u snem 2019 da rah ya ini ha Parliament.
