Jowai: I leh burom ya ki kiwa sikai ym kut i du kat ha ki soo kynrooh wa sikai yow tip u thoh u puræ, dawa ko leh ya ki khynnah wow pyndep ha kiwa boon ki thaw ki rukom, kamtæ ki khynnah ka Shlem Sikai Tynre yong ka Seiñraij Jowai, kam ka dak wow e i sñiawngooh ya kiwa sikai kiwa chimkhia u yah u tyoor luti ya ki yei tip niam, rukom, dustur ha kani ka sngi Bibar wa da dep da chim ki wow pynman ka yalang leh burom kyrpang hapyrdi i sakhilang u Pa Dolloi ka Elaka Jowai u Puramon Kynjin, U Pator ka Raij Jowai wa kiwi kiwi kiwa chah khut sñiawbha.
Ha kani ka 29 tarik u Naikhynde noh charñn sngi, ki khynnah ka Shlem Sikai Tynre- Seiñraij Jowai kam ka dak i sñiawngooh sniawburom yei wa da yoh nei yah i tyoor luti kiwa sikai ya ki chaphang i tip niam wa ki rukom-dustur, da chim ki wow pynman ka yalang lehburom kyrpang ha Yung Dorbar ka Seiñraij wa em ha Loompyrdi Iongpiah.
Ya ki bynta yong ka prokram ha kani ka janmiet da pynlai da u Markynsai Shylla wa ka Synchar Dhar, kam wow kdar luti ya ki bynta wa chakhmat ka Sharai Synrem da yieñ ko wow siang ki kyntien ngoohblai ngoohsyiem, ka Salandaka Laloo da e ko ki kyntien pdiang burom katwa ka Manhaka Shylla won ha ka bynta wakut da yieñ ko wow e ki kyntien sñiawngooh.
Ha kani ka prokram da yoh leh yei klam wa kyrpang heiyatoh wa kani ka sngi lehkmen leh burom ya kiwa sikai ka Shlem Hikai Tynre na ka Emon Laloo kawa da e i sñiawngooh wa khroo ya kiwa sikai waroh kiwa da yaleh sakhiat u tyoor u tule yei tip niam, rukom, dustur ha ki na ki por cha ki por.
U Pator u Raymond Nartiang, hawa yieñ wow e kyntien hapyrdi ki khynnah heiyatoh wa kani ka sngi, da kdar u wow batai ya ka yurim yong ka Teachers’ Day neitæ won booh pachat u leh ki kyntien sneiñ kyntien kroo wa ki kyntien e mynsien ya ki khynnah deiwa ong, hawa leh yeiwon yeiwon emkaam u man kiwa yaichah, kiwa tip u ri yei burom-akor iwa da yoh sikai na ki por cha ki por wei banjoor u leh ya ki khynnah wow man kiwa sñiawsuk sñiawbang u pynlut por hei wow pynjanai yei tip niam iwa da yoh sikai waka mynstep mynried man kawi u man wan phi ki wow rap pateiñ yei sikai niam ha kiwi.
Chooh chooh da em leh i e burom ya kiwa sikai wa maya yong ki kawa man ka dak i sñiawngooh sñiaw makhane yei kaam wa khroo wa sarot yong ki ya waroh ki khynnah neitæ won da pynkmen pyn ka-it wei pynphooh pynpheiñ ya kani ka sngi da ki chaad, ki rwai sur tre kiwa man hapyrdi i riam i bait wa yoo chongkun chongkhia dei chimbyntalang da waroh ki khynnah.
Discussion about this post