Jowai: Ka Seiñ Kur Dkhar Jaiñtia Hills Central Body hapoh i yahkhmat u Vice President yong ka, u Harwis C. Dkhar, u General Secretary ka seiñ, u Hamjhan H Dkhar da pynskem ki ya ka Seiñ Kur Dkhar Jaiñtia Hills West Zone wow tip kam ka “Iooksi, Iawthymme, Saphai Unit” ha ka 28 Naikhynde 2019 ha chnong Saphai.
Ha kani ka sngi ya ka yalang da pynlai da u Stalbinus Dkhar uwa man kam u Vice President ka West Zone hei emlang ki khon ka kur kynthai wa chynrang nadooh Iooksi, Iawthymme, Saphai hei wow ap wow yei sñeiñ i kroo na ki waheh wa sian yong ka kur.
Kiwa da e i klam ha kani ka sngi nadooh u Mothing Dkhar, u Mondaystar Dkhar East Zone, u Habahun Dkhar MDC, u Binroy Dkhar kiwa da ban joor bha wa ymhoi u em i sñiaw yaphær niam næ ka kaam saiñ pyrthai (Politics) neibhah wa ka kur toh u man ko kawi don kam chipayu lada em ha kawon kawon ka jait niam leh.
Chooh chooh da ong wa kam ki khon ka kur emkaam wow em i maya hapyrdi yong ki khlem em i kheiñ ya kiwa na sor næ palat sor, kiwa yoh na kiwa dooh wei emkaam wow man ki kiwa yatylli kam ka kur.
Da pynphooh ya kani ka sngi da i chaad na ki khon ka kur, kamjooh da emlang leh ki waheh wa sian yong ka kur nadooh u Medistar Dkhar uwa man kam u General Secretary yong ka West Zone, u Stephan Dkhar Pator Raij Raliang wa pait ya ka Elaka Raliang, u Bnai Dkhar, wa ki manbei ka kur Dkhar na chnong Raliang.
Discussion about this post