I awri awra hapyrdi ki ar jaitbru wa kynthup ya ki Karbi wa ki Pnar ha Block I da jia i dei langær heiwa ha kani ka kynti katkam ka yutip wa tikna ini i awri da mih i hadien wa lehbor ki Karbi ha iwi i hali ha chnong Mowjem.
Da ong wa nachwa da jooh em i paanbor ki Karbi wow rep u thung u tep ha ki thaw ki Pnar nadoooh nachwa tangwa ha uni u snem da em ki kattu katni ngut na ka jaitbru Karbi kiwa da wan paan thaw wow rep saroo tangwa hadien wa chah kyntait ki neiliang kini ki bru (Karbi) da wan thung yabor ki ya u saroo ha ini i thaw wot hadien wa chah kyntait ki.
Ya ini i thaw da tip kam i Iaw Muksow, Sopiang wa haap hapoh ka chnong Mowjem kawa man kawi na ki chnong wa heh dooh ha Block-I.
Hadien ini i wan thung yabor ya u saroo ha ka 15 tarik da em ki bru kiwa da phut ya ki tre saroo wei ynne da mih i awri hapyrdi kini ki ar jaitbru iwa da pynbor ya ki bor ka aiñ na West Jaiñtia Hills wa na Karbi Anglong District wow pynsuk ya ki paidbah.
Ka seiñ KSU-WJHDU leh da hiar ko cha ini i thaw wa em i awri ynne ka sngi wei neiliang ki heh ka seiñ da ong ki wa nachwa jooh e thaw ki Pnar ya ki Karbi wow rep donhi tangwa hadien won kamtre wei chna yung ki ya kini ki thaw rep.
Da ong ki wa ynne da rai wow booh tarik wei wow wanrah ya ki bor aiñ na waroh ar District wow pynbait noh ya ini i kaam deiwa pynrap leh wa ki tre chnong ka Mowjem da em ki ya ki kot ki sla wa biang deiwa kyntu ya ka sorkar wow pynbait noh ya i kaam pood wow suk ki paidbah wa em ha khappood.
