15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Lehkmen Christmas ka SURE ha chnong Mulum

Advertisement ad1

Kam chibynta wow lehkmen ya ka Advance Christmas, ka Society for Urban & Rural Empowerment (SURE) deiwa ya krehlang wa ka North East Slow Food & Agro biodiversity Society (NESFAS) da pynman ki yaka yalang haka chnong Mulum ha ka 21 tarik uni u bnai hei ya emlang u MLA yong ka thaaiñ u Nujorki Sungoh kam u kongsan.

U MLA hawa e yei klam yong oo da yaroh u hadooh kattæ kattæ yei krehkaam yong ka SURE ha kini ki thaaiñ iwa da wanrah leh ya i kylla khamtam hawa yatoh wa ka rep ka riang. Ha i jooh i por da ong u leh wa ki paidbah ka chnong Mulum leh da ya chimkhia ki ha kawon kawon ka kaam wa pynman da ka SURE wei na ini i daw ka kaam lai ko chakhmat. Da ong u leh wa kiwa chong chnong toh u man ki kiwa yatylli lang khnang wow wanrah yei kylla hapoh chnong poh thaw wei na ini i daw ka chnong Mulum da bna bha ko katni ha i liang i jhoor tynre.

Ka Hamsniawpher Suchiang kawa man ka Convener yong ka Participatory Guarantee Scheme (PGS) Group da pyntip ko chaphang i sdang ya kani ka Group kawa man ka kynhun kawa da yoh yaka Certificate wa tipmit yaka rukom rep tynre. Ha i jooh i por kani ka kynhun da ye ko wow lai dai leh yaki jhoor warep khlem dawai cha ki chnong wa marjan lyngba ka Scheme wa tip kam ka Farm on Wheels (ka yaw ha ki chaka kari). Deiwa pynemkaam ya kani ka Scheme, kini ki warep da pyndap jhoor ki ya ki chnong kiwa marjan. Ka Suchiang da pyntip ko leh chaphang ka Community Seed Bank (CSB) namo ka thaw lum symbe tynre kawa da booh hapoh ka chnong Mulum. Da ong ko leh wa i thong yong kani ka CSB toh wow pynneh pynsah ya ki symbe tynre khnang wym dooh jait ki.

U West Suchiang, Waheh Chnong ka chnong Mulum da pynsñiaw u yei sñiawngooh yaka SURE wa da jied ki ya ka chnong Mulum wow emlang ha kani ka Project wei da khana u leh ya ki kaam wa da dep leh ha ka chnong kam i sdang ya ka kpær skur (School Garden), wa kiwi de ki kaam waphær waphær kiwa yatoh wa ki khynnah skur, ki manbei, ki khynnah khynroo, i pynneh pynsah ya ki symbe wa kamtæ ter ter.

Ini man ko kam chibynta yong ka Project wa da e pyrtuid “No one shall be left behind: initiative” wa da kyrchaan poisa da ka Rural Electrification Corporation, New Delhi. Nalor ka chnong Mulum, ka SURE ka kreh ko leh haka chnong Mukhkap kawa em hapoh ka Thadlaskeñ Block. Ha kani ka sngi da emlang leh u Secretary ka chnong u Dieky Suchiang, u Tbn u Bigi Suchiang, ki dkhot ka PGS Group, ASHA, Youth Club wa ki wakreh ka SURE.

Ha kani ka sngi da yoh leh ki rwai wa da e da ka Iaraplang PGS Group wa ka Youth Club yong kani ka chnong. Ki dkhot ka Youth Club da ya chimbynta ki leh da i ya rwai lyngba ka Online ZOOM Advance Christmas kawa da ya chimbynta da ki dkhot wa kiwa kyrchan ka NESFAS kiwa em ha kylleiñ ka pyrthai. U Phrang Roy uwa man u Chairman ka NESFAS da e u ya i klam ha kani ka sngi naka nongbah Rome, Italy.

Da pynwai ya kani ka yalang da i ah ya u Cake Christmas wei da e ya i duwai e ngooh na u Tbn. Bigi Suchiang.

Share this:
Previous

Kem ki pulit ka New Delhi ya ka Priyanka Gandhi

Next

COVID-19: Da 94 lak tam kiwa da chait ya kiwa dang chah ktah ha India