Ka Shangpung Presbyterian Lower Primary School ynnin ka sngi da ko poi cha u moomer wa 150 snem hei chakri ko ya ka chnongShangpung ha i puræ puthi.
Ya kani ka skur da seiñ ya ka ha u snem 1865 da u Don Sutnga uwi na kiwa nyngkong dooh wa kylla Kristan ha Shangpung deiwa bood u yei nuksa u Kiang Chulet. U Don hadien wa sniaw u wa em u Rev Thomas Jones II ha Jowai da lai yachem u ya oo wow yoh buit u sdang skur ha Shangpung.
U Rev. Thomas Jones II da pynchlur u ya u Don wei da phah u ya oo u sdang u ya kani ka skur.
Hadien ini u Don da lai biang u cha chnong u wei da pynlang u ya ki para Kristan ha Shangpung wei da yoh ki ya iwi i thaw wa e ka chnong iwa boon ki wa ngait toh i wa chong ksuid. Ini i thaw man i kam i kabu ksiar ya u Don heiwa da chna u yei wi i yung phlang wa khian hadooh wa kani ka skur do poi ko chadooh i kyrdan wa em ko katni.
Ha u snem 1891 u Rev. Jenkins da wan u cha Shangpung kam u Missionary wei man u leh kam u misteri wa stad bha wei da chna u sa kawi ka yung ya kani ka skur kamjooh leh ya ka wi ki Hostel ya ki chynrang wa ya ki kynthai.
Deiwa em u Rev. Jenkins kani ka skur da ku ko cha ka Class IV, V hadooh VI wei da kylla pyrtuid ya ka cha ka Welsh Mission Middle English School Shangpung.
Ha u snem 1922 u Soso Tham da wan sikai u ha kani ka skur kamjooh leh sa uwi uwa thoh kot Khasi wa pawnam u Babu Frank M. Pugh leh da man u kam u Headmaster wa nyngkong ya kyrdan Middle School yong kani ka skur.
Hei lehburom dap 150 snem ynnin ka sngi da wan chimbynta da ki khynnah skur wa puræ heini kamjooh leh da kiwa da dep puræ deilang wa kiwa sikai kamjooh kiwa da chongngiah kiwa e ya ki rwai wa ha rukom.
Da pynhær leh ya u diñkum kam ka dak kynmoo i dap 150 snem da u kongsan, u C. Ymbon, MLA. U Ymbon hei klam yong oo da ong wa i puræ puthi man i iwa kordor bha kamjooh deiwa em ki thaw puræ puthi ha chnong yarap ko leh sa ha kiwi ki liang ya ka chnong kam hei e yungwai kamjooh ka yaw ka haat wa em ha chnong. Da ong chooh chooh u leh wa i lai puræ puthi katni ym toh yow yoh kreh sorkar neibhah ym ye u e kreh ya waroh tangwa i puræ puthi toh u man ko ka laad wow ye i u yieñ ha i yong i hi ki kjat.
Ya i parom wa tbain yong ka skur da khana da ka R.M. Wann, da pynlait leh ya ka kot sahkynmoo (Souvenir) da u Dr. B. Langbang.
Da saam leh ya ki Certificate wa ki Mementos cha kiwa sikai warim, ki Headmaster wa kiwi kam i dak sñiawngooh ya ki snem wa da e ki neibynta kani ka skur.
Da em leh ha kani ka sngi kiwa na yung u Soso Tham heiwa ka Dr. M.Y. Tham da e khublei ko ya ka skur deiwa ong wa yooluti ka skur daw poi ko sa kawi ka 150 snem. Kamjooh leh sñiawngooh ko ya ka skur wa ka chnong Shangpung wa ye ko u e mynsien ya u Soso Tham u thaw ya ki wa boon ki poitri yong oo hei por wa em u ha kani ka skur.
Chwa u kut ka yalang da wai leh ya u moo sahkynmoo ya ka lehkmen Sesquicentennial Jubilee Celebrations. Da e leh ya ka dorkhat cha u C. Ymbon da ka skur yow yarap poisa ya ka skur u chna ya ka School Hall.
Discussion about this post