Ka jylla Arunachal Pradesh da lehkmen ko yei dap 36 snem yei man ko kam ka jylla wei yei dap 50 snem yei tipmit ya ka kam ka bynta ka ri India ha u snem 1972 wei da man ko kam ka jylla ha u snem 1987 heiwa chwa wow tip ya ka kam ka Arunachal Pradesh da tip ya ka kam ka North East Frontier Agency heipor ki pharæng wei man ko leh kam chibynta ka Assam.
Kam chibynta ini da wai leh ya ka Golden Jubilee Outdoor Stadium wa em ha Yupia, Itanagar kawa da man leh ka thaw wow pynman ya ki lehkmen wei kani ka Stadium toh kawa ye u chong 15,000 ngut ki bru kawa ye u pynman ya waroh ki jait yalehkæ kam ki yaphet pyllah, ki yaleh bol wa kiwi kiwi de wei da wan wai ya ka da u Montri Rangbah ka Arunachal Pradesh u Pema Khandu ynnin ka sngi uwa da ong wa ini toh ini toh ka Arunachal wa thymme wei daw chna chooh kiwa boon ki jait wa heh.
Ha ka lehkmen wa da pynman ynne ka sngi da emlang leh u Montri Rangbah ka Assam, u Himanta Biswa Sarma uwa da kular wow pynbait noh ya u pood waka Arunachal Pradesh.
U Sarma da ong u daw leh ya waroh iwa emkaam yow pynbait ya ini i kaam wa da sah slem deiwa ong wa nadooh u Naitung (Apr) daw sdang noh ya ini i pynbait pood.
Neiliang won u Montri Rangbah ka Arunachal da ong u wa waroh arliang da krehlang ki wow pynbait noh ya ini i kajia pood.
Ka Arunachal waka Assam da em ki ya u pood wa jrong 800 Km.
