Ka chnong Sonapyrdi kawa em hapoh Elaka Narpuh, East Jaiñtia Hills District ynne ka sngi da yoh ko wow lehkmen yei dap sanphaw snem (Golden Jubilee) ka chnong.
Ha kani ka lehkmen Golden Jubilee da wan wow chimbynta kam ka kongsan da ka Santa Mary Shylla, MLA ka 5-Sutnga Saipung Constituency, u Emlangky Lamare, MDC Narpuh Constituency kam u symbood kongsan ryngkat i emlang ki Waheh Chnong deilang ki Secretary chnong kiwa em hapoh ka Elaka Narpuh.
Ya ka yalang da pynlai da u Condrick Lamare, Chairman Golden Jubilee ka chnong Sonapyrdi, wei da yoh yei klam pdiang burom na u Daiapherbha Lamare, Secretary Golden Jubilee, na u Edimon Lamare, Waheh Chnong Sonapyrdi wa i klam e khublei ya ki paidbah na u Kwilnis S Suchiang.
Ha kani ka sngi da yoh u pynkup burom ya kiwa kitkaam chnong nadooh ki warim hadooh kiwa thymme wei da e burom leh ya kiwa chong chnong ka chnong Sonapyrdi kiwa sah cha kiwi ki chnong kiwa man kam kiwa yahkhmat chnong wa kiwa yahkhmat niam wei da yoh leh u saam khusnaam ya ki khynnah puræ kiwa da lehbha ha ki Exam waphær waphær nadooh kiwa pyndep Post Graduate, Graduate, HSSLC wa SSLC.
U Emlangky Lamare hawa e yei klam da ong u wa sñiawkmen u wow tip wa ka chnong Sonapyrdi da lai luti ko hadooh 50 tylli ki snem hapyrdi i kyrkhu kiwa boon kiwa chong chnong kiwa da yoh lyngba i yahluti u Blai wei da ong u wa ka chnong Sonapyrdi toh kawi ka chnong kawa pawnaam bha wei da em leh kiwa chong chnong kiwa stat wa kiwa chynna jngai wei da em ko leh chiboon ki khynroo leh kiwa stat kiwa tip.
Ha kani ka sngi da yoh leh yei e dorkhat heiyatoh wei paan yarap ka chnong Sonapyrdi u chna Multipurpose Community Hall wei neiliang yong u MDC da kular u e yarap neibynta kani ka kaam.
Ka Santa Mary Shylla hawa e yei klam da yaroh ko ya ka chnong kawa man kawi ka chnong wa pawnaam hapoh East Jaiñtia Hills, da ong ko wa ka chnong Sonapyrdi toh ka chnong wa em pyrdi kawa em hapoh Elaka Narpuh wei da yaroh ko ya ki bru kiwa em ha kani chnong nadooh ki waheh, ki khon khynroo yong ka chnong u man ki kiwa krehlang ha ka imlang ka sahlang khnang u ye u pynphet ya ki kaam chnong, wei heiyatoh wa ka dorkhat wa e ka chnong, da kular ko wow yarap poisa na ka Scheme SRWP hadooh Rs. 15 lak neibynta u chna pyndep ya ka Multipurpose Community Hall kawa da mang u lut haduh 1 klur 48 lak tangka kawa da sdang u chna nadooh u snem 2023, hawa kamwa 30% i kreh da ye u pyndep wei da sah sa du 70%, wei da kular ko leh u yarap na kiwi ki Scheme wei u pyndep u chna ya kani ka Hall hapoh kani ka samoi krehkaam ko.
Neiliang ka chnong da kyrkhu kyrdoh ko ya ka Santa Mary Shylla kawa da yarap bha ya ka chnong ha kiwon kiwon ki kaam yong ka chnong wei da yooluti u ye u pyndep ya kani ka Multipurpose Community Hall hei yarap yahluti yong ka kam ka MLA.
Discussion about this post