Ka Kiang Nangbah Government College Jowai ha ka 15 tarik uni u bnai da lehkmen ko ya ka lyngkhooh dap 60 snem i lai luti ka College namo ka Foundation Day, heiwa u Commissioner & Secretary ka chnat puræ puthi ka sorkar jylla, u V.K. Mantri, da wan u kam u kongsan hei emlang ka DSEO ka West Jaiñtia Hills, ka Dr. Wa-i-sa Sumer, kiwa sikai, kiwa puræ wa kiwi de.
Hawa e yei klam, u V.K. Mantri da pynsñiaw u yei emkaam u pynkhlan i tei i chna ha ki skur, i laitlooid hei puræ puthi wa i yoojngai neibynta i roi i paar ki thaw puræ.
Da yaroh u leh yei mahajon i yoh pateiñ ka Kiang Nangbah Govt. College kamjooh leh i e chakri ko yaki paidbah ka Ri-loom Jaiñtia, wei deiwa kreh chitom nadooh ki Principal, kiwa sikai, kiwa kreh, kiwa lai puræ wa hanla boon ki chlem puræ wa mih thymme leh tangwa kani ka College khriñ ko ya ki khynnah na i parom i naam wa em ko nadooh warim.
Hawa pynsñiaw yei emkaam u pynbiang wei pynkhlan yei tei i chna, kular u leh wow yaklam hapoh ka sorkar neibynta u chna pynbha ya ka Auditorium kani ka College yeiwa da pynsñiaw da u Principal, u H.Toi.
Ong haroh u emkaam u thooh ki laad ki luti yow pynkhlan yei roi i paar ka mynried, dei wow em leh ya ka College Development Fund neibynta u kyrchaan ya ki kaam pynroi ka College.
Da pyntip haroh u wa ym slem de da khut Application neibynta ka Chief Minister’s Scholarship kawa Rs. 6000 wei u pynlait leh chwa ka Christmas. Neitæ ong u wa daw pyrchang leh u pynlait sa ya ka Second Instalment ka Umbrella Scholarship chwa ka Christmas.
Hawa klam hajrong i kylla i rukom puræ puthi ha kani ka juk Artificial Intelligence (AI), u Vijay da pynchlur u ya ki khynnah wow rap pynlai yumut ki heiyatoh i chemphang wa rap phær wa i rukom pyrkhat wa thymme.
Kyntu u wa katwa ka juk Techonology wa AI dang wanrah ko i pynkylla dur ha ki kaam waphær waphær, tangwa i chemphang wa i bor pyrkhat man iwa emkaam u neh sah ha ki khon khynroo khyllood.
Da ban joor haroh u hajrong i emkaam u lailang chirup chirup wa i kylla i por wa kamjooh ki laad ki kabu yong ka mynried.
Ha kani ka sngi, ka College da e burom ko leh da ka Silver Jubilee Awards cha kiwa sikai ka College kiwa da e palat 25 snem i chakri ki, neitæ da e Award cha kiwa poi chakhmat hei kyrdan Graduate yong uni u snem wa ki Award yong samen ha ka NCC wa NSS ka College.
Ya ka yalang da pynlai da ka SMF Blah, da yoh i klam pdiang na u H. Toi, Principal ka College, katwa yei ktien e khublei da e ka V.S. Syiem.
Discussion about this post