15 49.0138 8.38624 1 0 4000 1 https://wyrta.com 300 0

Lehkmen ka Rotary Club Jowai yei dap 25 snem

0 Comments
Advertisement ad1

Jowai: Ka Rotary Club Jowai kawa man kawi na ki seiñ kreh moh sñiawbha kawa da kreh chiboon ki kaam wa bha haka imlang sahlang, haka 18 tarik uni u bnai da sdang ko yaka lehkmen 25 snem namo ka Silver Jubilee ka lai luti yong ka haka yalang wa da pynman ha Hall ka Loomsoiung Newhill Jowai.

Da wan wow emlang ha kani ka lehkmen da u Vincent H Pala, MP ka Lok Sabha kam u kongsan, ki Rotarian ka Shillong City, ki dkhot ka Rotary Club Jowai wa kiwi kiwi haka yalang wa pynlai u J.M. Pohsngap President Rotary Club Jowai.

Hawa pynsñiaw yaka lai luti ka Rotary Club Jowai, ka Rotarian E.F. Gatphoh da pyntip ko wa hapoh ki 25 tylli ki snem, ka Club da jop ko chiboon ka thong neibynta ka imlang sahlang, heiwa ka Club da embynta ko wow yada yaka wah Myntdu kawa psa umdih yaka chnong Jowai, da chna yaka Check Dam ha Treiongriang da i kyrchaan poisa kawi ka chnat Rotary kawa na USA, da pynyoh ka kari kit metyap cha ka chnat pulit wa kyrchaan da u R.C. Laloo Ex MLA ka 2-Jowai, da pynyoh kari Ambulance cha ka KJP Hospital Jowai, nalor wa da pynman leh boon ki Seminar hawa yatoh wa i dih drugs, dih kiad, kamjooh i e khusnam (Award) wa man u snem nalor kiwi de ki kaam.

U kongsan u Vincent H Pala kam uwi u dkhot wa embynta hapoh ka Rotary Club da kiwa boon snem, da pynsñiaw u ya ki myntoi lyngba wa embynta hapoh ka Rotary Club, da ong u leh wa man ko ka laad yarap wei wow yachem paralok kylleiñ ka pyrthai. Ha i jooh i por i yohlaad wow man kam ki Rotarian wym du wow pynmyntoi samen wei kamjooh leh ya kiwi.

Kamtæ da kyrmen u wa ka Rotary Club Jowai u nang ku ko chaphrang wei wow ye chooh chooh wow leh chiboon ki kaam wa bha haka imlang sahlang.

Ha kani ka jooh ka sngi, ka Rotary da chim ko leh ka kabu wow pynkup burom ya arngut ki khynroo kiwa da embynta wow wanrah yei burom yaka imlang sahlang, wa kynthup yaka Morelda Paswet kawa da pyndep yaka kyrdan Master Degree haka Music napoh Martin Luther Christian University, kawa da yarap da kiwa boon ki rwai tynre haka imlang sahlang.

Naitæ won u Deiwitawan Synnah uwa da sdang wow rwai nadooh i rta wa 11 snem wei katwa dang lai ki por ki snem dang ku wei da chna u boon ki rwai wa pawnaam.

Advertisement ad1

0 Comments

Leave a Reply