Ka Seiñ Raij Saphai da lehkmen ko yei dap 50 snem ka Lehniam Kñia Hula ha ka 10 tarik uni u bnai deiwa wan sakhi u Montri sorkar, u Sanbor Shullai chirup i emlang u Comingone Ymbon, MLA ka Raliang deilang u MDC ka Saphai, u Rikut Parien, u pa Dolloi ka Elaka Raliang, u Chawas Lyngdoh, u President ka Seiñ Raij Jowai, u Hercules Toi, u Dr. Mihshwa Tyngkan, u Moonlight Ktung, u Waheh Chnong ka Saphai, u Velentine Gino Synnah, u Chairman, u Pynbaitlang S Passah wa kiwi de.
Ka phang pyrdi wa da pynman ya kani ka lehkmen toh kawa ong “Yei tre i thied u thooh yoh ka pateiñ u krai u phooh”.
Ya ka lama da pynhær da u President ka Seiñ Raij Saphai, u Kershwa Langstang wei da yoh ya ki kyntien ngooh Blai wa ka ngooh ka dem na u Powerking Shulet uwa man leh kam u Ex-President.
Ya ki kyntien pdiang burom da yoh na u Pradip K Shulet uwa man leh kam u Chairman ka SMC ka Seiñ Raij School Saphai.
Da e ya i kyntien maitphang da u Iadalangmi S Passah uwa man leh kam u General Secretary ka Seiñ Raij Saphai.
Da em leh i ah Cake wei pynlait ya ka kot Souvenir da u kongsan, u Sanbor Shullai deilang u Comingone Ymbon ryngkat wa ki waheh waroh kiwa ya emlang ha kani ka sngi.
Da yoh ya ki chaad ki rwai na ki chnat Seiñ Raij waphær waphær kam na Shangpung, Raliang, Muthlong, Mynska, Laskein, Mukhap, Mulieh, Mowtyrchiah, Iooksi, Khonchnong wa na kiwi ki de.
Ha kani ka sngi neiliang ka Seiñ Raij Saphai da e ko leh ya ka Memorandum neibynta wow kær kynroh ya ka duwan kñia wa ka kynroh neibynta u booh ya u mot u Kiang Nangbah hakhmat ka madanbol ka Seiñ Raij School Saphai wei i kwah booh ya u mot u Kiang Nangbah toh da san tylli ki snem deiwa pynman ya ka Tournament kawa tip kam ka “Kiang Nangbah Memorial Trophy Football Tournament” wei neiliang u Sanbor Shullai da ong u wa daw pyrchang u wow yaklam hapoh ka sorkar yow pynyoh yeini iwa da paan ka Seiñ Raij Saphai.
Na u MDC won da paan da kyrpaad ka Seiñ Raij Saphai wow e yarap neibynta u pynyoh ya ki Class Room wa ka yung thaw rieh slap yow suk heipor wa wan thooh skur ki bei ki pa ki khynnah.
Ha kani ka sngi da yoh leh i sneiñ i kroo na ki waheh kam u Hercules Toi hajrong ka phang: Ka Niam halor i stat i tip. Kamjooh leh na u Dr. Mihshwa Tyngkan uwa da e yei klam hajrong ka phang: Ka riam ka beit ryngkat ka niam ka rukom.
Hawa kut da pynhiar ya ka lama da ka men Shillong Rabon, da e i kyntien khublei da ka manbei Kheiñkor Suchiang deiwa kitbok ya waroh wow lai suk wan suk cha ki chnong ki thaw.
Discussion about this post