Ka Ephatha Society, East Jaiñtia Hills District deiwa kyrchaan ka yung krehkaam u Deputy Commissioner, East Jaiñtia Hills District deilang ka District Sports Officer (DSO), East Jaiñtia Hills District wa lyngba ka District Sports Promotion Society (DSPS), ha ka 15 tarik uni u bnai da lehkmen ki ya ka World White Cane Safety Day 2025 ha ka yalang wa da pynman ha Khliehriat West Futsal Playground, Khliehriat.
Da ya emlang leh ha kani ka sngi wa u Sub-Divisional Officer (SDO)-Sadar, East Jaiñtia Hills District, u M. Kumar deilang ka District Sport Officer, East Jaiñtia Hills District, ka Stephanie Rapsang, u President ka Ephatha Society, East Jaiñtia Hills District, u Emlangmi Sapuh wa kiwi de.
U President ka Ephatha Society da ong u wa em du ki donhi ka NGO ha waroh kawi ka District wow yarap ya ki bru em i duna i tlot hei bor i doh i pran namo ki Persons With Disabilities (PWDs) wei ha kani ka sngi World White Cane Safety Day 2025 kawa man ka sngi wa kyrpang ya kiwa duna hei bor khmat da pynman ya ka yalehbol yong lok yow pynsñiawthooh paidbah wa kitu kiwa duna hei bor khmat leh em ki yei sap i tap wot wow chimbynta hei yaleh Sports wa kiwi de ki kaam wa man-ka-sngi.
Ka yalehke wa da pynman toh hapyrdi ka Team A-1 wa Team B-1 heiwa kiwa chimbynta toh kiwa duna hei bor khmat na kylleiñ ki District ka Meghalaya kiwa da pynyoo yei sap yong ki heiwa da jop ka Team B-1.
Discussion about this post