Kamwa da sdang ya ka bynta wa ar yong ka Nasha Mukt Bharat Abhiyan Campaign 2025, ha West Jaiñtia Hills wow yakhun pynduna kamjooh u pyndooh jait yei pynemkaam drugs hapoh ka District katkam ka thong yong ka Ministry of Social Justice and Empowerment, kamtæ ynne ka sngi ka yung krehkaam ka District Social Welfare West Jaiñtia Hills District chirup i yakrehlang ka District Hub for Empowerment Women deilang ka chnat pulit ka West Jaiñtia Hills District, da pynman ki dei lai uiñ da ki ar chaka namo ka Bike Rally kawa da sdang na pchem ka District Library, Mynthong, Jowai wei da pynkut won ha madan Wahriong Mihmyntdu ha deilang ki Wyrta pynsñiawthooh cha ki paidbah hajrong i maa i pynemkaam drugs iwa da ktah ya ka yung ka sem kamjooh ka imlang sahlang.
Ya ka Rally da kaweh lama na District Library da u Additional SP, West Jaiñtia Hills, u Ishan Gupta IPS, uwa da ong leh i yakhun pyrchah yei drugs man i yakhun ha ka pyrthai hi waroh kawi, wei iwa da poor smat bha haka juk katni ha kylleiñ ki thaw wot chei thaw wa cha kdong cha chmiang leh.
Kamtæ kamwa ki chnat waphær waphær em ki chiboon ki bynta wow leh hajrong ini, kyntu haroh u ya kiwa wan chimbynta wow man kitæ kiwa rah khubor u pynsñiawthooh hajrong i maa i drugs, wei hadooh katwon man kordor u im khlem da maad ya ki jait dih wa boonjait.
Ong haroh u kamwa ka jylla Meghalaya kamjooh ka Ri-loom Jaiñtia toh ka thaw wa da kyrkhu kyrpang lyngba ka bei ramaw wa yoosuk, toh u man leh kitæ ki bru wa lehkmen yei yoosuk ki soodong sookun, ka riti dustur ym hei dih drugs wa kiwi ki jait dih pynmuaid.
Manda poi ha Wahriong Mihmyntdu da yoh i klam na ka S. Shylla, Secretary VO Mihmyntdu, na u Chibaitmi Langstang, Ambassador Nasha Muk Bharat Abhiyan, uwa da klam hajrong i bynta wa kongsan tam wa ki khon yoo ki pyn hapoh i yung i sem wei da pynbood ki.
U SI J.K. Majaw napoh ka Anti-Narcotics Task Force yong ka chnat pulit West Jaiñtia da khana u ya ki aiñ ki kyndon wa kam ka chnat pulit hap ko u leh ya ki bru wa dih kamjooh kiwa dai drugs.
Neitæ ha kani ka sngi da em leh ka bynta chim kular hajrong u yakhun pyrchah yei dih drugs wa da yahkhmat da u D. Nongtdu, OC Jowai Police Station.
Yei klam e khublei da yoh na ka Y. Najiar, DSWO.
Discussion about this post