U President ka Hynniewtrep Youth Council (HYC), u Robertjune Kharjahrin da dawa u wa ka sorkar toh u pynbait noh ko ya i kaam khappood chwa ka Election neibynta ka kylla wa ar.
Da ong u wa lada ymye wow pynbait ya u pood chwa ka Election wei lada ymye wow kem ya ki pulit Assam wa siat yap ya ki 5 ngut wow bichaar ya ki pynyoo i wa u Conrad Sangma emkti lang u ha ini i kaam wa jia ha Mukroh.
U heh ka HYC da ong u leh wa lada ka sorkar ksoh kular ko wow pynbait ya u pood hapoh 45 sngi kamwa da pynbna tæ ym jia iwa sñiawsih ha Mukroh.
Heijooh i por u Robert da klam che u wa ki seiñbhalang ym chah ki wow Register Case ha West Karbi Anglong hajrong i chah siat ha Mukroh, tangwa ya ka Case toh u wanrah ha West Jaiñtia Hills.
Da ong u wa ki seiñbhalang ki klam che ki wa da biang da boon tylli ki mynsien wa da khlaad wei i por leh da biang wow chim i kitkhlieh ymtoh wow pynbor ya u Conrad Sangma, tangwa ya ki 36 ngut ki MLA wow chimkhia wow pynbait noh ya u pood u ang neibhah lada yang ya u Sangma tæ daw wanrah i yei sang i maa.
Hajrong i wym yoh laad wow thang yei dur bula hakhmat yung u Montri Rangbah, da ong u “Conrad sa katwon bnai u em mi ha kani ka yung neibhah i yung chong u Montri Rangbah da chna da ka poisa ki paidbah.”
Da beiñ u leh yei khang ka sorkar yaka Internet wei i wym chah wow yakhih paidbah deiwa pynrap wa daw poi i por wa ki paidbah u kynjat ki ya u Conrad na neiñ cha wah.
U Robert da phah u leh yei maham cha ka sorkar wow sñiawbha ham tynjooh palat yei yaichah ki khynroo, neibhah wot lada khang ya ka Internet tangwa lada mih i chrai, ka sorkar iyi u leh ko.
