Ka Jaintia Students’ Union (JSU) ynne da lai dawa ko katkam ka aiñ wow pyndam noh ya ka Public Hearing ka Shree Cement Limited kawa dadep pynman ha ka 31-07-26 ha Lum Syrman, East Jaiñtia Hills.
Ki dkhot ka seiñ da yachem ko wa u Chairman ka Meghalaya State Pollution Control Board & Member Secretary, SEIAA, u R. Nainamalai (IFS). Da yachem leh wa u CPCB Scientist, u Arnab Mandal kamjooh wa u Deputy Commissioner ka East Jaiñtia Hills yow e dorkhat yow dawa u em u yei bahkhlieh.
Ka JSU da e por ko 10 sngi cha waroh kini wow pynbait yeini wa da bakla wei lada ym leh iyi iyi daw lai cha ka National Green Tribunal (NGT) wa ka High Court ka Meghalaya yow yaleh pyrchah wa ka sorkar.
Neiliang ka seiñ da e daw ko wa ya kani ka Public Hearing toh kawa leh tangdep khlem da bood kyndon heiwa da neh ko du 45 minit donhi deiwa khang laad nadooh ya kiwa rep kiwa pyrchah kamjooh ki tre thaw wow pynsñiaw ki yeiwa pyrchah ki heiwa da chah du da ki bru wa da jied donhi wow chimbynta.
Da ong leh wa da ya sooh buit nadooh ka sorkar, ki pulit kiwa da leh pyrchah aiñ yow khang ya kiwa chah ktah wow lai cha ka Public Hearing deiwa pynsangeh ki ha Lad Shnongrim, wot hawa u DC da pynmih hukum u wow chah u lai u chimbynta ki.
Najrong ini da em leh kiwa tih ya u sarok yow lait ki bru wa pyrchah u lai chimbynta ha ka Public Hearing hadooh wa da ktah ko ya kawi ka kynthai kawa punkhon.
Kamtæ da dawa wow pynyap noh ya kani ka Public Hearing kawa dadep pynman, u kyntait ya waroh ki Clearance wa da e, u pynman sa chisien da ka Public Hearing kawa man laitlooid wei wow thung da ka High-Level Inquiry kawa man laitlooid yow takit ya ki sahep ka MSPCB wa ki pulit ka District ki wym em leh yei kaam yong ki.
Discussion about this post