15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Lyngba ka lai Rally da khut da kyntu yaki paidbah yow krehlang neibynta u pyndooh yaka kjut TB

0 Comments
Advertisement ad1
Advertisement ad1

Jowai: Kamwa i kjut TB næ Tuberculosis toh kawi naka jait kjut haka pyrthai waka ri India kawa boon dooh kiwa yoh yaka, neiliang ka chnat i chait i khiah ka sorkar da thooh ko boon ki laad ki luti hajrong kammon u pynduh yaka. Kamtæ ynne ka sngi kawa man ka sngi kynmoo ya ka World Tuberculosis Day, da sakhi wa haka West Jaiñtia Hills District leh lyngba ka Rally da khut da kyntu yaki paidbah wow wan chakhmat u yakrehlang khang wa ka thong i thmu u man ko kawa jop.

Da kyntu yaki paidbah wa lada em ki yaki dak ki chin kam i khai kyoh wa neh ar tayaw næ tam, i iñdoh, i mih chit hei miet, riñ rkhoh, kyoh snam wei wym bang bam, toh u limih smat smat chaki thaw sumar wa jan yow phah Test.

Advertisement ad1
Advertisement ad1

Ymtoh u sñiawsih u ñiawliar lada yoh yeini i kjut neibhah toh kawa ye u pynchait, tangwa emkaam u bood thij yei batai ki Doctor næ kiwa kreh haki thaw sumaar kam wow tymmoh thad lumar yei ktien hawa kyoh hawa synrieh, u mynthu ha ki jait tadong dep te tymmoh, nalor wow tikna wa dih pynlut leh ya ki dawai.

Da ong wa i wym dih tikna dih pynlut yaki dawai ye ko u wanrah i kjut TB wa rap joor.

Haka yalang wada  pynman ha Mynthong District Library, ka Dr. I. Khynriem Medical Officer TB Control DTS, West Jaiñtia Hills District da e ko i batai bniah hajrong kani ka kjut, wei ong wa ka kjut TB ye u yoh yaka hawa rin pynhiar mynsien yaka lær wa em u khñiang TB, wei boonsien ki manyung wa dooh wa rap yoh ki yeini i kjut, neibhah nalor wa duna baam ki, i bor khlan i doh i pran yong ki leh tlot ki wow yakhun ya kani ka kjut wei ktah ko heiwon iwon i bynta ka met.

Da ong wa em ar jait ki kjut TB kawi kawa ktah ya u snier wa tip kam ka Pulmonary TB kawa poor cha kiwi ki bru kawi won wa ktah yei won iwon i bynta i doh i pran watip kam ka Extra Pulmonary kynthup yaki Glands, i lang um, TB Chyeiñ  TB sner, TB Khlieh (Meningtis) TB sniehdoh wa kiwi i wym poor cha kiwi.

Katwa neiliang ka Dr. J.N. Shullai Director MCSWA I/C TB-HIV, ong ko wa i kjut HIV poor ko lyngba ka snam, lyngba ka manbei pynkhon, lyngba u thyrnia wei chongkha. Ha kam kini ki khep ka kjut wa chim kabu bha yaki bru wa em HIV toh ka TB neibhah da tlot i bor u yaleh pyrchah i doh i pran yong ki yaki kjut.

Heijooh i por e ko i batai bniah hajrong ka buit thymme yong ka sorkar yow pynkut pyndooh ya kani ka kjut kawa tip kam ka 99 Dot. Wa lyngba kani ka prokram daw pait yei rukom dih dawai kitu ki bru wa yoh ya arjait ki kjut ka TB waka HIV.

Neiliang ka kongsan ka D.D. Syngngai MCS, EAC West Jaiñtia ong ko, kamwa ka thong hi thmu ko wow pyndooh pyndam syndon ya kani ka kjut, wym mut won wa du i kit khlieh ki Doctor næ ki bru ka chnat i chait i khiah, tangwa dei yakrehlang yong uwi pa uwi.

Da pynrap haroh ko wym toh u e laad wa kani ka kjut u wanrah ko i dooh noh i ya kiwa maya saya, kiwa hayung hasem, ki lok ki jor wa kiwi, tangwa toh u rah ka khubor cha kiwi won hajrong kammon u pyndooh yaka.

Hei yatoh u pynduna ya kani ka kjut, da jied leh artylli ki Block ha Ri-loom Jaiñtia wow lait nei kjut TB wa kynthup ka Amlarem waka Saipung Block, heiwa ki Asha u lai ki kut thlu yung yow Test nalor u pynman ki yalang pynsñiawthooh paidbah waphær waphær.

Haka Rally da yachim bynta daki khynnah skur waphær waphær nalor ki kattu katni ngut kiwa kamai kari Local Taxi wa kiwi kiwi.

Share this:
Previous

Thap pyrtuid u Vincent Pala, ha ki 10 snem nga ym jooh put turoi pyn ya nga hi

Next

Da booh ya ka Control Room-cum-Complaint Monitoring ha EJH neibynta ka Election MP