Ka KSU-EJHDU ynni ka sngi da lai mih ko cha ka yung krehkaam ka NHIDCL hadien wa ka seiñ da dep yaleh RTI ko hajrong u sarok 4-Lane tangwa ym em yoh jubab deiwa hun wei ka seiñ da booh ko da ka Appeal heiwa u Appellate Authority da pdiang u yeini deiwa khut yaklam u ya waroh ar liang ha yung krehkaam ka NHIDCL deiwa emlang u CPIO.
Hawa yaklam hajrong ini wym hun yei rukom jubab ha NHIDCL yaka RTI, neiliang u CPIO da khana u wa hadooh kattæ i kreh ya kani ka 4-Lane ha East Jaiñtia Hills District toh iwa dang pynkhreh donhi wei ym pu ye wow e yei jubab wa pura khlem da mynjur yaka DPR (Detail Project Report) yong ini i kreh wei da khana u leh wa i leh sorjamin dang lai bait hi lada ym em iwon iwon i thut khamtam yow jied yei thaw yow lai u sarok.
Chooh chooh neiliang ka seiñ da tip ko leh wa ka NHIDCL da thmu ko chna ya kani kam ka Greenfield Project khnang wa i chna ya u sarok ym jynjar wei u man iwa bait.
Da pyntip leh wa katkam wa da pynkhreh daw em kamwa ar tylli ki Tunnel kiwa daw kynjoh 6 Km i jrong wei daw em leh boon tylli ki yingkieñ ki wow tam 100 Meter i jrong. Da khana leh wa neiliang ka NHIDCL wa kani ka kreh toh yow pynsuk paidbah wei daw chimpor hi.
Hawa kylli won hajrong ka poisa wa da mang neibynta ini i kreh, da khana wa dapoi hadooh Rs. 26,000 klur wei yow lai bait daw hap wow yoh yei mynjur da kiwa hakhlieh dooh ka chnat wa toh u pait yeini wei hap leh wow mynjur wot na ka Cabinet ka sorkar bei wa lyngba u Montri Rangbahdooh ka ri.
Hawa kylli won chaphang ka bai khyndaw namo ka Land Compensation, ka NHIDCL da ong ko wa yeini daw hap wow bahkhlieh da u DC yong ka District wow su wei ym pu ye u kheiñ hadooh katwon u e chi Square Feet. Hajrong ini ka seiñ da ong ko wa la kammon kammon leh toh u su dei dor wa ki tre thaw mynjur ki.
Ka seiñ hajrong ini da ong ko wa daw booddien ko yow pyntikna wa ini i kreh ym sahkut i chiteiñ por wei da yooluti u lai bait.
Discussion about this post