Shillong: Ynne ka sngi, ka Thma u Rangli (TUR) da pynsñiaw paidbah ko yei duna wei i chah ban beiñ ki wakreh Muster Roll ha ka tnat Sericulture & Weaving, khamtam hei yatoh wa ka nongsngi wa kiwi kiwi i eh wa tyngkhooh ki ha Deba Das Memorial Community Hall, Laban.
Ha kani ka pynsñiaw paidbah, da chem wa boon ki bru kiwa mih du i pyrtuid khlem iwon iwon i kreh tangwa ya ka tulop won yoh ki thij pa thij hajrong wym biang i rukom krehkaam katkam ka yutip na ka RTI.
Iwa sñiaw phylla toh wa em kiwa kreh Muster Roll kiwa da chah beh kreh nadooh u snem 2015 tangwa ka RTI da pynyoo ko yei su tulop wa lai bait da kani ka tnat katwa kini kiwa kreh won ymtip ki iyi iyi leh.
Neiliang u Director ka Sericulture u C.K. Marak ym ye u wow jubab che hajrong ini wa da chem ha ka RTI.
Da paanmaap u hajrong wa i eh i khoo wa yachem kiwa kreh Muster Roll neibhah wymtoh iwa leh khnang tangwa iwa jia ryngkhat hi-eh da ong ka TUR, wei da ong u wa ka Sericulture man ko kam ka Corporation heiwa kam kini mih ki wei emkaam u pynbait lang yeiwa eh.
Ka Angela Rangad na ka TUR kawa da thooh yutip ko lyngba ka Right to Information (RTI) da ong ko wa ini i pynsñiaw paidbah toh wow batai ya ki chaphang ka yutip wa da yoh lyngba ka RTI hei yatoh wa ki Muster Roll ka Sericulture & Weaving.
Katkam wa chem ya ka yutip lyngba ka RTI, kiwa kreh Muster Roll ha Sericulture Farm ha East Khasi Hills (Lawsohtun) em ki 89 ngut, ha West Garo Hills em ki 76 ngut, ha South Garo 75 ngut, ha West Khasi Hills (Umsohpieng) 107 ngut, East Garo Hills 32 ngut, ha Muga Farm Sohliya, Ri-Bhoi em ki 101 ngut, Eri Seed Grainage Nonpgoh em 60 ngut, Mini Eri Grainage, Umden Centre em 56 ngut, Jirang 46 ngut, Mulberry Nursery Mawsyntai Nongpoh 84 ngut, Government Foreign Race Seed Moodymmai em 97 ngut, Government Sericulture Farm em 102 ngut wa ha Regional Foreign Race Seed Ummulong 110 ngut.
Tangwa na kini, kiwa boon toh kiwa mih pyrtuid donhi ha ki kot ki sla, katwa hei sakhiat ym yahaap wei em kiwa kreh kamwa mih ha ka RTI. Kawa lyngngoh won wa ka su tulop ko thij thij cha kini ki bru wa mih pyrtuid.
Kiwa pait hajrong kani ka pynsñiaw paidbah da kynthup ki ya ka Patricia Mukhim wa u Pastor Nathan Diengdoh kiwa da chong ap wow sñiaw yei ood ki Muster Roll wa kamjooh ye pynche na ki tnat Sericulture & Weaving ka jylla.
Ka Angela Rangad da ong ko wa i thmu kani ka pynsñiaw paidbah toh wow kyruiñ neiliang i chah pyndooh wa i eh i khoo kiwa kreh Muster Roll wa i chah pyndooh kaam ki katkam ki kot ki sla da chem wa da boon ki wym biang i rukom krehkaam kani ka tnat.
Ka Angela da ong ko leh wa daw lai ujor ya kani ka kaam baamtooh wa chyrkhei cha u State Vigilance Commissioner wei wow dawa na oo wow pynman u ya ka takit.
Discussion about this post