Lyngba ki CSC yoh ki paidbah wow yaklam wa u Narendra Modi

Jowai: Ka CSC-SPV (Common Services Centre- Special Purpose Vehicle) Meghalaya kawa pait wa pynlai ya ki CSC (Common Services Centre) kiwa em ha ka jylla da yoh ki ya ka laad ka kabu wow embynta lang ha ka program Mann Ki Baat ha ka 15 tarik uni u bnai ha waroh ki District kiwa em ha ka jylla Meghalaya wei da sakhi lang kiwa em hapoh ka ri lyngba ka Webcast.

Kam wow pynkynmoo ka program Mann Ki Baat toh kawa pynmih lyngba ka All India Radio, DD National wa DD News kawa pynlai da u montri rangbahdooh ka ri u Narendra Modi yow yohlaad ki paidbah wow yaklam wa oo.

Da man ko ka program kawa da yohlaad kiwa boon wow kylli ki ya kiwa boon ki phang wa emkaam wow pynku ya ka imlang sahlang kamjooh hei rukom im samen man ka sngi.

Ha kini ki snem ka sorkar pyrdi da sdang ko ya ka “Digital India” kawa thmu wow yarap wow pynku ya ka yoh ka kot kamjooh leh ya i nang i stat ha ka ri. Ka Mann Ki Baat program ym em mut ko du ya ki sahep sorkar namo ya ki bru wa kreh sorkar wow yohlaad wow yaklam wa u Modi da man ko leh neibynta waroh hapoh ka ri nadooh ki khynnah skur hadooh ki warep.

Related posts

Kyntu ki seiñ ki jaitbru ri-loom ka Manipur wow dam u chibynta ha ka Election District Council

November 13, 2024

Ym yoh Ticket u Baitlang na ka VPP wow yakhun MDC na Jowai South, paan u yei kyrchaan kam u kyrtong samen

November 12, 2024

Ka CSC-SPV Meghalaya da pynman ko ya ka kam kani ka program ha waroh ki DC Office, ki CSC kiwa em ha jylla Meghalaya wei da em leh kiwa yoh u ap ya u Modi lyngba ki Smart Phone deiwa Download ya ka Namo App. Ha kani ka sngi da chimbynta da ki VLE (Village Level Entrepreneur) ki khynnah skur, ki wakreh sorkar, kiwa chong chnong wa ki wakreh ka CSC-SPV.

U Narendra Modi ha kani ka sngi da yaroh u chiboon ya ki CSC kiwa em ha ka ri khamtam ya ki CSC kiwa em cha ki chnong nongkyndong.

Lyngba ki CSC ki bru da yoh yarap ki chiboon wow sñiawthooh wei wow tip wow pynemkaam ya ki kor Computer. Ki CSC da e ki ya i chakri wa boon nadooh ki kaam sorkar kam ki Online Service kamjooh ha ki kaam samen ki bru.

U Modi da yoh u leh wow yaklam wa ki kattu katni ki VLE kiwa pynlai ya ki CSC wa kammon yarap ki ya ki paaid wa chong chnong lyngba ki kor Computer. Chooh chooh da ong wa ha ka 20 tarik u bnai wow wan da pynkhreh wow yaklam wa kiwa rep lyngba kani ka jooh ka program.