Lyngngoh ka Congress wym em pynbna paidbah yei rukom pynbait pood kamwa da kular

Ka MLA yong ka Congress na East Shillong ka Ampareen Lyngdoh kawa man leh kawa yahkhmat ka Congress Legislature Party (CLP) da pynsñiaw ko wa kam ka seiñ da dap ko dei lyngngoh wa i kular wa da toh u pynbna paidbah ha ka 21 tarik uni u bnai kawa man leh ka sngi lehkmen dap 50 snem ka jylla yow pynkut noh yei kajia pood ha ki kattu katni ki thaw ym em mankaam wei ym em i pynbna hajrong ini.

“I dap i dei kmen wa khroo ya ini i kaam wa da pynlai chakhmat lyngba ki Regional Committee da i thmu wow pynman kaam bait ya i kaam pynbait pood wa ka Assam, neibhah ki dkhot kiwa em hapoh ki Regional Committee leh da yoh mynsien ki wa waroh u lai bait,” da ong ka Ampareen deiwa pynrap wa neiliang yong ka sorkar won ym chah ko wow pynbna paidbah ya ki yaklam kiwa da man hapoh ki Regional Committee.

Hawa yatoh wa i pyrchah yong ka Congress ha Assam ya i rukom pynbait pood yong ki ar sorkar, ka Ampareen da ong ko, “Ym ye wow tip iyi i pyrkhat i yong ki wei hajrong kayi ka yurim wa pyrchah ki. I yoo i wa ka sorkar ha Assam da khut ko ya ka yalang yong waroh ki seiñ saiñpyrthai hawa pynche hajrong ini i kaam, i won heini ym tip iyi wa da yaklam ki.”

“Lada pyrchah ki leh, ye wa phær yei sñiaw yong i ha kani ka jylla, ka Congress ha Meghalaya ka pait bait ko yei yoh wa i dooh neibhah wow chong ha Shillong wei klam kaam pood ym yahaap neibhah ki dkhot yong i leh embynta ki ha ka Regional Committee hawa lai e ya ka Report cha ka sorkar,” da ong ko.

Related posts

Em 151 tylli ki kreh wa thylli, phah u Wailad ya ka DSC wow thooh lada dang em chooh kiwa wa lait

May 16, 2025

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

“Kamwa man ha i bynta wa nyngkong, i chem wa i pynkhreh yong ka Regional Committee yong ka West Khasi Hills, neiliang ka Congress ka kyrchaan bait ko yei mait phang wa kdaw ko neibhah wa da yoo wa da leh ya iwa biang tam,” da ong ka Ampareen.

Da ong ko leh wa katkam ka yutip wa da yoh lyngba ki yaklam, i chem yong ka Regional Committee yong ka Ri-Bhoi won ym em che kamwa che yong ka West Khasi Hills, katwa ya ka Jaiñtia Hills won ka Congress ym tip iyi iyi leh.

Iwa rap eh dang yang, kitæ neibynta ka bynta wa ar yong i pynbait pood, neibhah ha West Khasi Hills daw wan lang ka Langpih wa ha Jaiñtia Hills wa Ri-Bhoi leh em ki bynta wa eh, neibhah wa katkam ka yutip wa da yoh da em i pyrchang neiliang yong ka Assam wow kam wot ya ki thaw wym em ya kajia, hawa u Montri Assam da sdang u wow kdaw lang leh ya ki thaw wa kynthup lang ha ka yaklam yong ki, da ong ka Ampareen.