Ka seiñ JNC ha ka kyrwoh wa da phah na u President heh dooh ka seiñ, u Sambormi Lyngdoh da pynsñiaw yei lyngngoh wei wym sñiaw yahaap hajrong i klam u Montri sorkar uwa man leh u MLA ka Khliehriat, u Kyrmen Shylla deiwa ong wa ymtoh u bichaar jhan u wei wow tih tre yow tip hajrong i wanrah ya ka luti rel neibhah lada leh jhan daw sihlet won hadien.
Ka seiñ da phylla ko leh wa kat da u Montri ym tip u yei thmu yong ka sorkar wa lada u wanrah da ka rel wa kit mar namo da kawa kit bru. Ka seiñ da ong ko wa lada ka sorkar booh ko yei roi i paar hakhmat, ileh wym kyruiñ chwa cha kiwi ki kaam pynroi kam deiwa wanrah da ki College sorkar, ki Residential School wa u sarok kiwa e myntoi paka ya ki paidbah ka thaaiñ.
Dang ha kini ki kajiak bnai ka seiñ da lai yachem ko markhmat wa u Montri uwa da ong wa ya katni chooh ym ye wow ong iyi iyi neibhah ym pu tip bha chaphang katæ ka rel wa da thmu wow wanrah.
Ha i klam yong u Montri ha katu ka sngi da ong u wa lada ka rel wan ko daw myntoi u paidbah wei ka sarok leh ym sih palat neibhah wa daw lai noh da ka rel, tangwa ka seiñ da ong ko wa lada ka sorkar chimkhia ko, u sarok leh ym sih u kamwa man katni.
Sa iwi leh ka seiñ sñiaw lyngngoh wow yoo wa heiyatoh i wanrah luti rel, ki Montri na Ri-loom Jaiñtia da sñiawsuk bha ki wei smat ki wow klam tangwa hawa pait cha ki laad pynroi neibynta ka Ri Jaiñtia ym em uwi leh wa smat u klam.
Kamtæ hajrong ini i bynta, ka seiñ daw lai ko cha ki chnong ki thaw hapoh Jaiñtia Hills yow pynsñiaw paidbah wei wow e leh i pynche wei wow ya syllok hawa yatoh wa ini i thmu wow wanrah luti rel ha East Jaiñtia.
Discussion about this post