theme-sticky-logo-alt
theme-logo-alt
Advertisement ad1
Advertisement ad1

Lyngngoh ka KSU wa yada u Vincent ya ki karkhana khyndaw-bilat

Advertisement ad1
Advertisement ad1

Ka KSU Narpuh Circle da pynsñiaw ko yei lyngngoh yei pynbaad u Vincent Pala, MP ya kiwa pyrchah hajrong i yap ki dakha ha wah Lukha deiwa ong wa kitu kiwa pyrchah toh ki wym yoh pisa.

Ka seiñ da ong ko wa sñiawsarom wa kat u MP wa jied da ki paidbah dei maya wei chaniah wow ong u kam kini ki kyntien heiwa yeini da ong u hawa e sñiawbha ka Star Cement ya ki kor sumaar cha ka Dr. Norman Tunnel Hospital, Jowai.

Advertisement ad1

Ka seiñ da ong ko wa u MP da kheiñkor u chiboon ya ki karkhana pynmih khyndaw-bilat bar ya ki paidbah ka jylla heiwa da yaroh u leh ya kini ki karkhana wa toh ki wym jooh pynmih jakhlia. Da kam u leh wa da dep u wow leh chiboon i thooh bniah namo ka Research wei da tikna u wa i yap ki dakha ha Wah Lukha ym toh na ki kharkhana pynmih khyndaw-bilat.

Ka seiñ da kdaw ko wa wot u warep, uwa kreh mylla leh tip tikna u wa i yap ki dakha ha Wah Lukha nadooh u snem 2007 toh na ki kharkhana pynmih khyndaw-bilat wa em ha Narpuh. Lada u MP da dep u wow leh Research kamwa da ong, tæ tip hi u ma-ai katwon ka pH Level ka um yong ka wah Lukha waka wah Lunar? Hadooh katwon ka Copper Sulphate wa em wei katwon man Acid? Neiwon mih kini ki Copper Sulphate wa ki Acid?

Kamtæ ka seiñ da ong ko wa lada u MP da dep u wow pynlang yei thooh bniah, da kyrpaad ya oo wow pynmih khubor lane e paidbah yeini waroh yow ya tiplang.

Ka seiñ da lyngngoh ko leh wa ha yalang ekti ya ki tiar sumaar, u MP heithaw wow klam chaphang kini ki tiar da klam pathan u chaphang ka Star Cement. Iyi mut u wow klam bait ya ka Star Cement. Iyi emyatoh ka Star Cement wa kitai ki kor sumaar bru. Ka seiñ da kyntu ko ya u MP wow syndong ya u thylliej yow leh u mong kiwi.

Ka KSU da pynkynmoo ko wa ki seiñbhalang wa ki paidbhah em ki yei hok wow pyrchah yei yap ki dakha, ki em hok ki wow pynbaad ya ki karkhana, neibhah chwa u 2007 ka wah Lukha toh kawa khooid kliar khliar. Waroh ki karkhana pynmih khyndaw-bilat em ki ya ki Captive Thermal Power Plant wa pynmih bordiñ lyngba u mooyong, kitu ki tngit wa mih lyngba kitai ki Power Plant cheiwon lai ki?

Da pynkynmoo leh wa ka Topcem Cement ynnin u snem ym em lai e ko ya ka Water Compliance Report cha ka Ministry of Environment, Forest & Climate Change. Kani ka karkhana da murieh ko ya katai ka Report wei da tharai wa u MP wa emburom oo tip bha u yeini. Kamtæ da ong wa kiwa pyrchah ym toh ki wym pu yoh poisa tangwa kiwa kyrchaan kopsar kiwa da dep yoh poisa.

Da pynkut deiwa ong wa u MP hei thaw wow yada ya ki paidbah, tangwa da yada pathan u ya ki karkhana wei iwa maa toh wa yoh wa mihkhmat kam kini.

Ka kyrwoh na u S. Bamon, General Secretary wa na u KS Suchiang, President KSU Narpuh Circle.

Share this:
Previous

Diaw mynsien ki MDC ka liang pyrchah yei lehbeiñ ka EC ka JHADC ya ki paidbah

Next

Jop ka Pasyih Cultural ya ka Mulang Ialong ha ka 18 Above ka WJDSA