Ha ka yachemlang ki Montri sorkar namo ka Cabinet Meeting kawa da pynman ynne ka sngi, da mynjur wow maap noh da ki spah klur tangka ka kuna wa ka dan ki tre Truck, deiwa wanrah deiwa su chisien su lyngba ka One Time Settlement Scheme (OTS).
Hawa pynbna yeini i rai, u Montri Rangbah ka jylla, u Conrad K Sangma da pyntip u wa ka kuna na ka dan wa khlem su da ki tre Truck da jan poi ko kamwa Rs. 900 klur, wei ya kattæ ka sorkar daw phah su noh ko du 10% na ka kuna wa du 20% na ka dan wa kynthup ya ka MV Tax wa Passenger Tax.
Da ong u wa em boon bha ki Truck wa ki kari kamai wa kamai ha kylleiñ ka jylla kiwa khlem su ya ka dan wa ya ka Passenger & Goods Tax deilang ka Fitness, em kiwa khlem su 3 snem hadooh 20 snem. Da ong wa ye u man neidaw wym em hi su næ wym poi pyrkhat næ wym em chimkhia, wei ka kuna ku ko man-ka-sngi ya kawa ki tre kari næ kiwa yah ym tip ki.
Da ong u wa lada kheiñ du ya ka kuna kawa yatoh wa ka Fitness, daw poi hadooh kamwa Rs. 900 klur, wei na ka MV Tax man ko kamwa Rs. 21 klur wa Rs. 5 klur ka kuna ya ka Goods & Passengers Tax, wei neiliang ka sorkar sñiaw ko wa man iwa emkaam wow booh noh da ka dor yow su wei wow pyntikna wa ki tre kari u su bait ki ya ka dan neini chakhmat.
U Conrad da ong u wa ini i rai yong ka sorkar toh awjan waroh ki tre kari toh ki tre jylla wei daw ktah ko ya ki lada phah su lut ya ka dan wa ka kuna.
U Montri Rangbah da ong u wa ka sorkar da rai ko wow maap noh haduh 90% ka kuna (Penalty) wa 80% ka dan (MV Tax/Goods & Passenger Tax), wei da e por ya ki tre kari wow su ya ka OTS hapoh ka 31 tarik u August, wei na ini i maap ka sorkar daw yoh ko du kamwa Rs. 120 klur hadooh Rs. 150 klur.
Discussion about this post