Shillong: Uwa e ktien yaka Congress uwa man leh u MLA ka Rangsakona, u Zenith Sangma da pynbaad u wa em i baamtooh wa chyrkhei ha ka chnat bordiñ hapoh ka jylla, heiwa da pynbaad u leh wa ka sorkar da lute ko da ki spah klur ka poisa paidbah, hawa pynkrehkaam ya ka poisa wa da e da ka Asian Development Bank wow booh ya u Smart Meter, i kreh yaka Ganol Small Hydel Power Project, ka Saubhagya Scheme, ka Deen Dayal Upadhyay Gramin Jyoti Yojana Phase I & II wa hawa yatoh wa i maap ya ka bai bordiñ. Hajrong ini i pynbaad, neiliang uwa yahkhmat ka Congress da dawa u leh wow thung da ka kynhun takit CBI hajrong ki kaam baamsap ha katai ka chnat wei wow pynchitom ya kiwa emkti katkam ka aiñ.
Hawa klam ya ki laad pathai khubor ynne ka sngi, u Zenith uwa man leh u montri warim ha ka sorkar MUA, da pynbaad u wa i baam tooh ha ka chnat bordiñ kynthup ko nadooh i thmu pynkrehkaam da ki Smart Meter, heiwa ya ini i kaam da kyrchaan poisa da ka Asian Development Bank (ADB) hadooh T.200 klur, wei da ekti wow pynkreh du ha kawi ka Company, ka Shabnam Global Infrastructure Ltd, kawa da pyntam leh ya i dor yong i kreh hadooh 18% kawa da poi cha ka T.36 klur.
Da ong u wa i wym khooid i khut Tender ya i kaam da pynman yaka jylla wow dooh hadooh T.36 klur, deiwa pynwan ya ki kyndon ha ka Contract wa kiwi ym ye ki wow kreh, tangwa da jied bait ya ka Company kawa da thmu chwa wow e.
Uwa yahkhmat ka Congress da ong u leh wa hawa yatoh waka Deen Dayal Gram Jyoti Yojana, kawa toh ka Scheme wa da mang 85% na ka sorkar India wa 15% na ka jylla, da pynsepai hadooh T.4.5 klur neibhah wa da pynku dor wow kreh hadooh 30%, deiwa ong wa kani ka sorkar MDA ym em de maap ko wow lute na ki paidbah lada toh kiwa heh næ kiwa khian.
U Zenith da ong u leh wa i maap haduh 100% ya ka sut wa toh u su da ki karkhana neidaw wa su slem ya ka bai bordiñ da pyndooh nong hadooh T.700 klur, deiwa pynrap wa lada ka MeECL maap ko ya ka sut ki paidbah, ka Congress ym em pyrchah ko tangwa ini i maap ya ki karkhana kiwa heh wa kiwa em i yoh nong da che wa em i baamtooh wa chyrkhei. Da ong u leh wa i pynhiar ya i dor ka bai bordiñ neibynta ki karkhana leh daw wanrah ko yei eh ya ki paidbah, deiwa pyntip u wa ha i por nachwa, i dor cha ki karkhana toh T.6.2 chi Unit katwa katni da pynhiar cha ka T.4.9 chi Unit.
Hawa yatoh wa i thung ya u Director ka MeECL, uwa yahkhmat ka Congress da ong u wa nadooh u Naikhynde ym em de wa chimkti ya katai ka kaam hadien wa da chong ngiah u Director warim, wei da kdaw u wa khlem thung da kiwi wa ym pu em yoh da ki bru kiwa man ki yong ki hi kiwa kohngooh katwa hukum.
Da pynbaad chooh chooh u wa i jubab yong u Montri Rangbah ha ka yung dorbar wow thung noh ym slem de ya u CMD wa pura ha MeECL, tangwa ym pu yoo yaki dak ki chin hadooh katni heiwa dang neh bait da u sahep sorkar uwa dang khian kyrdan.