theme-sticky-logo-alt
theme-logo-alt

Maham chah thngan kiwa kreh Mid Day Meal lym yoh jubab yei dawa hapoh 12 sngi

Ka All Jaiñtia Mid Day Meal Workers Union Jaiñtia Hills, Jowai haka yalang yong ka Central Executive Committee ynne ka sngi ha Community Hall ka Dorbar Chnong Ladthalaboh, Jowai da chim ki yaka rai u e por biang hadooh ka 21-05-2022 yaka sorkar India kamjooh ka sorkar Meghalaya wow jubab yeiwa thoh ki hajrong i dawa pynku nong ya kiwa chet ja sngi haki skur wa kiwi de i dawa neibynta i bha i miat kiwa chet ja skur (Mid Day Meal Cooks).

I thoh wa ka seiñ dadep phah ko cha u Narendra Modi, u Montri Rangbahdooh ka ri wa cha u Montri Rangbah ka jylla lyngba u Lat ka jylla toh ha ka 01-04-2022.

Ka seiñ da maham ko wa lada ka sorkar ym ye ko u e jubab hapoh katai ka tarik, kam kiwa chet ja sngi ka jylla daw khut pynman ki dei chah thngan ha Shillong ha uni hi u bnai.

Hajrong i wym su ka sorkar jylla yaka nong wa T. 100 chi bnai waka T. 900 chi bnai na ka sorkar pyrdi, iwa da sahteiñ nadooh u bnai Khonchonglad (Nov) 2021 hadooh uni u Naitung (Apr) 2022, ka seiñ pynsñiaw ko i diaw hadooh kattæ kattæ neibhah waka sorkar jylla won hukum bait ko u chet ja sngi yaki khynnah man-ka-sngi.

Da ong ki i nong wa dang sah toh soo bnai, wei kamni ym man pap mo u chim yaka poisa ka bhah kiwa dooh wa duk, wei la heini rukom kam ka sorkar jylla kheiñ burom hi ko mo yaki kynthai ki manbei ha kani ka jylla?

Ka seiñ da lai haroh ko cha ka yung krehkaam yong ka DSEO, WJHD tangwa kat wym em wan kreh ko da yachem noh ki ya u L.S. Lyngdoh, Joint Director DESEL West Jaiñtia Hills District, wei hei yaklam yong ki neiliang kiwa yahkhmat ka seiñ AJMDWU kamjooh kiwa chet ja sngi da kyrpaad ki ya oo wow yaklam u waka sorkar jylla neibynta u su smat noh yaka nong wa sah nadooh u Khonchonglad (Nov) 2021 hadooh u Naitung (Apr) 2022.

Wei i rukom su leh toh u leh deiwa thap haki Bank Account kiwa chet ja sngi, khnang wow pynkrehkaam noh yaki kyndon ka sorkar India wow su poisa lyngba ka DBT.

Ya ka yalang ha kani ka sngi da pynlai da ka Biola Ïakai, Vice President ka seiñ hei emlang u J.A. Suting President, ka Joyceful Lypon, General Secretary, u Khroo L Pariat uwa e buit ka seiñ, ka Dayoo Ïakai, President ka All Jaiñtia Muster Roll Workers & Labour Union wa kiwi.

Share this:
Previous

Psiah NPP ka Dr. Jasmine Lyngdoh ka payu tre ka Ampareen

Next

Khlaad syndet u Ma Dibait Rymbai uwi na kiwa ak phlim Pnar