Maham chah thngan kiwa kreh Muster Roll ka ri-loom Jaiñtia lada ym mano ka sorkar yei dawa yong ki

Jowai: Kiwa kreh Muster Roll kiwa em hapoh ka seiñ JPWDMW&LU da sdang ki ya ka yakhih yong ki wow dawa yei hok yong ki da i lai paidbah wa jai-jai namo ka Peaceful March ha ka 30 tarik u bnai wa da dep na Tpep Pale heipor 10:30 i step wei da kut ko ha madan Ladthalaboh, Jowai.

Ki Muster Roll kiwa ya chimbynta da em ki 1270 ngut wei em kiwa da wan yah wa ki khon ki yong ki na waroh ki chnat ka sorkar na kylleiñ ka West wa East Jaiñtia Hills District.

Ka rai katwa ka sorkar ym ap ko ya i dawa ka seiñ iwa da kut i e por 15 sngi nadooh wa da dep pynkynmoo ko ya ka, kamtæ da rai wow e por biang ya ka Sorkar sa 10 sngi wei lada ym pynkrehkaam ko ya ini wa dawa ka seiñ, u sdang sa ka chah thngan kat hadooh wow pynkrehkaam ka sorkar yeiwa dawa ka seiñ.

Ya ka yalang da pynlai da ka Dayoo Ïakai kawa man ka Vice President ka seiñ wei da yoh yei klam na ka Maino Syngkon, ka M. Lyngdoh heiwa da kyrpaad kiwa em ha kani ka kynti ha kani ka sorkar toh u pynkrehkaam noh ko ya ka Pension, wa u pynku noh ya ka nongsngi kawa T. 300 khamtam kini ki manbei kiwa da heh kiwa su kut noh i kreh kam ki Muster Roll, da yooluti bha ki wow yoh ki ya kini iwa dawa ki.

Related posts

U pyndam ka Mizoram ya kiwa kreh sorkar ki wym ye wow leh yei kaam yong ki

November 28, 2024

Sdang ka sorkar da ka Community Public Private Partnership deiwa e yarap Rs. 106 klur

November 28, 2024

Da yoh leh ya i klam na u K. L. Pariat President ka seiñ heiwa da kyrpaad u ya ka sorkar wa u e noh ya yeiwa dawa ka seiñ, khamtam kiwa kreh Muster Roll toh ki wakreh kiwa khooid tam, kiwa ym em ka baam-tooh, heiwa lada ym em kini ki Muster Roll, ym yoh ya ki sarok, ki liar ki dooid kiwa khooid iwa da krehchitom ki hapyrdi wym yoh ki ya ka nongsngi kattu la kamwa 6-7 bnai, em kiwa wot tang ka Arrear ym yoh ki, iwa ha pyrdi wa da yoh ki ya ka nongsngi kawa T. 189 donhi.

Ka Meghalaya Regularisation of Casual Workers Scheme 1996 kawa toh hok u yoh ki Muster Roll tangwa ka chnat PWD (Rds& Building) ym em pynkrehkaam ki ya ka hadooh katni. Ka Education Scholarship kawa da toh u e ka Meghalaya Building & Other Workers Welfare Board cha ki Muster Roll kiwa man dkhot ha ka, hadooh ynne ym em e ka Board.

Ha kani ka sngi da yoh leh yei klam na u Chanbor Dkhar Asst. Genl. Secy. ka seiñ.