Ka Hima Sutnga Youth Federation (HSYF) da beiñ joor ko yei chah pam khiar ki dieñ kamjooh i khayi tooh ya kini ki dieñ khloo kiwa napoh ka Elaka Sutnga.
Neiliang ka seiñ da pynkynmoo ko ya ki khon ka Elaka Sutnga wa toh u khang pyrchah ya kiwon kiwon ki bru wa pam dieñ wa kiwi khayi ya kini ki dieñ wa mih na ki khloo ka Elaka wei toh u chah du ya kitu kiwa pynemkaam yei kaam samen kam wow chna yung wa ki kaam chnong tangwa ymtoh wow khayi yow pymih poisa.
Ka HSYF da ong ko wa da tip wa em ki kattu katni ki bru kiwa da chim kabu wow tyngkheiñ ya kini ki kyndon wei da lai pam tooh wei kit tooh ya kini ki dieñ khloo wei da khayi leh ya kini ki dieñ iwa man pyrchah ya ka dustur riti wa ki hukum yong ka Dorbar Elaka, wei da wanrah ko leh yei chah ktah ka rymaw neibhah wa da stang ki loom ki wah.
Chooh chooh ka seiñ da ong ko wa kiwa emkti wow leh yein i kaam da em leh kiwa na baar ka Elaka wei lada chem ya kam kini ki bru khlem pep u pynchitom ya ki deiwa khor.
Kamtæ ka HSYF da kyntu ko ya ki khon ka Elaka Sutnga wow burom ya ki aiñ yong ka Elaka wei wow ya krehlang yow e yei yada ya ki khloo ki kjam yong ka Elaka. Wei da kyntu leh ya kitu kiwa emkti wow sangeh ki chisiendon ya kini ki kaam wei da maham leh ya kiwon kiwon wa emkti wa daw pynchitom ki nadooh uwa khayi, uwa ah dieñ, uwa yah kari, ki kari wei daw e ki cha ki bru ka aiñ.
Discussion about this post