Ka seiñ wa tip kam ka Jagadguru Shankaracharya Avimukteshwaranand Maharaj kawa thmu wow pynman ya ka Rally yalap yow kheiñ kyntang ya ka masi kam ka mrad wa kordor wei wow sangeh yei choh doh wei baam doh masi, da pynsngeh noh ko yei thmu wow wan klam wa kiwa thoh khubor ha Shillong Press Club (SPC) ynne hadien wa da yaklam wa u President ka SPC, u Deimaia Siangshai lyngba ka Phone neidaw wa em ki dkhot ka HYC kiwa kwah wow yachem wa ki.
U President ka HYC, u Roykupar Synrem da maham u deiwa eh wa lada kini ki bru wan ki wow pynman ya ka Rally wow yalap sangeh baam doh masi næ wow kheiñ kordor ya ka masi, neiliang ka seiñ ha ka jooh ka sngi daw pynman ko da ka Rally baam doh masi.
U Roykupar da ong u wa i wan yong ka HYC hajan ka Shillong Press Club ymtoh wow pynmih kulmar tangwa toh wow yachem wa kiwa yahkhmat ka Jagatguru Shankaracharya Ji Maharaj yow pynsñiawthooh wa 95% kiwa chong chnong ka Meghalaya toh kiwa baam doh masi.
Chwa ini, neiliang u President ka SPC da lai pyntip u wa kani ka seiñ da thmu ko wow yaklam tangwa ka SPC da pynsangeh noh ko deiwa sñiawthooh wa i thmu yong ka Press Conference toh hajrong ka masi wa i thmu wow pynman Rally ha ka 2 tarik u Naichiphaw.
I poi ki dkhot ka HYC cha yung krehkaam ka SPC toh hadien wa da tip wa kani ka seiñ da thmu ko wow yaklam wa kiwa thoh khubor hajrong i thmu wow pynman ya ka Gau Dhwaj Sthapana Bharat Yatra, da i thmu wow yalap sangeh yei choh doh masi wei wow tipmit ya ka masi kam ka bei yong ka ri namo ka ‘Rashtra Mata’.
Discussion about this post