Jowai : Ka seiñ Khasi Jaiñtia National Union (KJNU) da pyrchah joor ko yei thmu ka sorkar wow kyrriah kaam noh ya u Deputy Commissioner ka West Jaiñtia Hills District ka wa khlem nongrim uwa da kreh dang du kamwa chi snem tam i wym pu kut ka samoi yong oo kam U DC ka WJHD.
Ka seiñ da ong ko wa daw pynmih pyrtuid ko leh yong ki sahep ka sorkar yong ki tnat waphær waphær hapoh WJHD kiwa da kreh palat yei por katkam ka service rule, wei daw dawa ko leh wow kyrriah kaam noh ya ki lada ka sorkar ym ap ko yei dawa ki seiñbhalang wa ki paidbah wow pynneh ya u Arunkumar kam u DC.
“Da yoo i chiboon ki kaam wa bha wa uni u DC da leh u neibynta ka District yong i khamtam hei yatoh wa ka yingkieñ Kureliya kawa da sahteiñ da ki phaw snem, i thungkreh lyngba ka District Selection Committee ka WJHD wow man ko iwa khooid, wa kiwi kiwi” da ong ka seiñ.
Chooh chooh da ong ko wa uni u DC da chimkhia u wow wanrah yei yasuk hadien wa da yut chnong ki paidbah neidaw wa pynawri ki jaitbru Karbi, wei da chimkhia u leh wow yachem wa kini ki bru kiwa da sah ha yungkrehkaam ka KJNU, da wanrah u leh ya ki scheme waphær waphær, hapoh ka District.
Kamtæ ka seiñ KJNU da kyntu ko ya ka sorkar wow kyrriah chwa ya waroh ki sahep kiwa da kreh palat snem wei da pynrem joor ko ya ka sorkar kawa da thmu wow wow kyrriah ya uni u DC ka WJH.
Kani toh katkam ka khubor na u Gneral Secretary ka seiñ u B. Samayang.
Discussion about this post