Jowai: Ka 6 Shnong Wah Lukha Association deilang wa i synraan u MDC ka thaaiñ u Desceous Pohshna ha ka 27 tarik uni u bnai da yachem ki ya u Chief Executive Member (CEM) yong ka Jaiñtia Hills Autonomous District Council (JHADC) neibynta wow kyrpaad ya oo wow dam noh u dai lilam ya ka wah Lukha cha ki bru samen kamwa jooh leh man u snem wei da kyrpaad leh wow e laad wow pyllai noh da ki 6 tylli ki chnong kiwa em harood yong kani ka wah hapoh i pait yong ka Association. Tangwa neiliang u u CEM ym ye u wow e ya ka rai hajrong ini i kyrpaad ka Association.
Neiliang yong u Secretary ka 6 Shnong Wah Lukha Association u Daiapherbha Lamare da batai che u ha khmat u CEM ka JHADC wa ki bru kiwa chong wa sah harood kani ka wah ki man ki kiwa dooh wa duk, boon kiwa im mylla sngi da iwa khwe dakha na kani ka wah wow pyndap pynbiang ya ka yung ka sem yong ki wei da ong u leh wa ka JHADC lada dai lilam namo ym dai ya kani ka wah ym kthah ko ya ka yarong poisa yong ka neibhah da dai ya kani ka wah hei dor T. 1,55,000 chi snem wei lada e ya kani ka wah cha ki 6 chnong katwon man ko ka myntoi ka kyrkhu ya kini ki 6 chnong.
Kamtæ neiliang ka Association da kyrpaad ko ya ki bru kiwa mut wow thied ya kani ka wah wym toh de wow thied ki neibhah ka Association ym chah ko ya kiwon kiwon ki bru na baar wow tong dakha katwa ngait ki na kani ka wah.
Ka Association da beiñ joor ko leh ya ka JHADC kawa pyrkhat du ya ka poisa tangwa manda jia iwon iwon ya kani ka wah ym jooh em wan pait ko wei ym jooh em leh ki iwon iwon leh i wow myntoi kani ka wah wei iyi u leh ka JHADC manda kylla rong biang kani ka wah.
Discussion about this post