Ki muktiar ka East Jaiñtia Hills District wa kynthup ya u Dawanmon Pachiang, u Jimmy Pdang, u Fredrick Muliar wa u Bebulme Sympli da pynsñiaw ki yei sñiawkhia ya ka Wah Litein dei thmu tih moochuni ka Shree Cement.
Da ong ki wa kani ka thaw tih moochuni kawa heh hadooh 217.394 Hectare toh kawa dapoi hadooh ha u pood ka Wah Litein iwa daw ktah yei long i man ko khlem da pyrkhat de iyi wow jia mynried mankawi ya kani ka wah.
Da phylla ki leh wa ha ka Draft Environmental Impact Assesment (EIA) wa da e ka Shree Cement da ong wa ym em ki um ki wah hajan kani ka thaw tih moochuni tangwa katkam ka wa da yoo lyngba ki GPS Coordinates, kani ka thaw tih moochuni toh kawa yabi wa ka Wah Litein iwa phær bak-la-bak wa iwa da kam ha kani ka EIA Report.
Kamtæ da ong wa lada lai chakhmat wow tih moochuni daw ktah ko ya waroh kiwa im ha kani ka wah wei da yang chwa i maa deiwa kai i khyndaw wa ki dawai wa kiwi de ki jakhlia wa mih na ini najrong wa ktah ko ya kiwa im-ja nei rep, nei khwe dakha wa kiwi de kiwa pynemkaam yeiwa emkaam ki man-ka-sngi.
Da ong leh wa i ktah ye ko wow man da i wym ye de wow pynkylla.
Hajrong ini waroh da dawa wow pait biang deiwi yeiwa da kam ha ka Draft EIA Report wei wow pynman ya ka takit wa laitlooid yeiwa da kam ha ka EIA.
Da dawa leh wow pyndam yeini wa da thmu wow tih moochuni ha ki bynta wa jngai 2 Km na kani ka wah wei wow yada leh ya ka Wah Litein wa kiwa em hajan ko.
Da maham leh wa lada ym leh yeini daw lai rah yeini cha ka NGT yow pyntikna wa kani ka wah yoh ko ye yada.
Discussion about this post