Ka People’s Democratic Front (PDF), Jaiñtia Hills District Committee, Jowai da thoh ko cha u President ka Party u Banteidor Lyngdoh, MLA uwa man leh kam u montri hapoh ka sorkar MDA wow yaklam waka sorkar hajrong i chah wow wan u mooyong na Assam ha ini i por wa em ka Lockdown pyrchah ya u COVID-19 wei wow wai noh chisyndon yei tih mooyong ha Jaiñtia Hills waka jylla Meghalaya waroh kawi.
Ya kani ka rai da chim hadien waka People’s Democratic Front, Jaintia Hills District da pynman ko yaka yalang District Committee ha ka 11 tarik uni u bnai.
Ka District Committee da ong ko wa kam u montri hapoh ka sorkar synrop MDA wow klam deiwa eh heiyatoh wa wan kit mooyong na Assam chapoh kani ka jylla yong i, neibhah kam ka rai ka sorkar India hi waroh kawi da pynman yaka khang chnong sbak næ ka Lockdown neidaw u COVID-19, wei kiwa chong chnong leh burom ki ya ini wei da yatylli wow yada na uni u khñiang khlam. Katwa ka sorkar jylla MDA da chah pathan ko wow wan kit ki Cement Company ya u mooyong na Assam cha Meghalaya. Heiwa ka Assam man ko ka jylla kawa chah ktah ha kani ka khlam. Hajrong ini, kiwa yahkhmat wa kiwa kyrchaan yong ka People’s Democratic Front, Jaiñtia Hills District da pynsñiaw ki yei pyrchah joor ya ini i leh yong ka sorkarMDA wa yahkhmat da u Conrad K. Sangma.
Da ong leh wa ka sorkar jylla ym em chimkhia ko wow wai biang yei tih mooyong khamtam ha kini ki por wa da yap lut ka kamai kajih ha ki kaam rep, kam kreh samen, i challan mooyong ter ter. Tangwa kani ka sorkar da e laad ko yaki baar jylla wow yoh kamai katwa ki bru yong i won yap thngan ki wei dooh kamai.
Kamtæ da kyrpaad ya u President wa waroh soo ngut ki MLA ka Party wow sñiawbha wow yaklam deiwa eh yow pynsangeh chi syndon ya kani ka kaam, neibhah wa man ko ka kaam yap kaam im yong u paidbah yong ka Meghalaya hi waroh kawi.
Ka District Committee da rai ko leh wa lada ym bien u President ka Party wow leh ya ini daw chong yalang biang yow chim da kawi won ka luti hadooh wow mih seiñ lang noh waroh chi syndon naka Party.
Discussion about this post