U Montri Rangbah ka jylla, u Conrad Sangma hadien wa mih pyrthai i rukom sah, rukom im kiwa chimbynta ha ka Meghalaya Games 2022 i wym yahaap de waka lympung yalehke wa heh dooh ka jylla heiwa i thaw sah toh iwa pai wa jæd, ki paikhana kiwa tngit wym hoi u pynemkaam, ki thaw sum wym biang ha JN Sports Complex ha Shillong, pyn ynne i miat da lai hiar u cha ini i thaw yow yoo dei khmat yong oo hi.
Neiliang u Conrad da yaklam u wa kiwa chimbynta heiwa da phah kit noh u ya ki yow phah pynsah hapoh Hotel.
Da pynsñiaw u leh yei wym sñiawkmen ya kiwa pynman ya kani ka lympung katæ ka Meghalaya State Olympics Association (MSOA) heiwa da emlang leh u Working President kamjooh u Co-Chairman ka Organising Committee, u John F Kharshiing.
U Conrad da ong u wa i thaw toh u man kiwa biang wei da toh wow pynbiang nadooh wa sdang ym toh kamni hei pyrdi synyaw wa hap u kyrriah ya ki.
Da pyntip cha u Conrad da ki dkhot ka HYC wa i thaw sah wa em ha yung krehkaam ka MSOA leh man ki ki wym biang heiwa ki chynrang wa ki kynthai da pynsah ya ki ha ka jooh ka yung heiwa ki paikhana toh ki wym biang tang ka um leh heiwa ya kini leh toh kiwa kyrriah dang hei miet.
U Conrad da yaklam u leh wa kini kiwa chimbynta yow khana ya ki wa daw kyrriah noh ya ki chapoh ki Hotel wei da kit leh ya ki da ka Bus.
U Conrad da maham u leh wow pynsangeh yei sdang ka Meghalaya Games 2022 lada ym ye wow pynbiang thaw sah wa ki paikhana wa biang.
