Maham u CEM ka KHADC ya kiwa em yatoh wa ka GCC u John Kharshiing

Shillong: U Chief Executive Member (CEM) ka Khasi Hills Autonomous District Council (KHADC), u HS Shylla da maham u ya kiwa synchaar chnong kiwa pep ha ka yalang ka Council of Traditional Chief and Headmen (CTCH) wow pynskem ya ka Council deiwa jied noh ya kiwa kitkaam wa pura.

“Ya kiwa wiar hi-eh ha kani ka yalang wa nyngkong ka CTCH khlem pyntip chwa, daw khut hajir i ya ki wei haap pynche ki wei lada ymye ki ye i wow pynchitom ya ki,” da ong u CEM.

Heijooh i por u Shylla da maham u leh ya ki Syiem yong ki Hima wa haap hapoh ka KHADC wa lada ym pyntip ki cha ki montri wa kiwa synchaar chnong daw chah phah hajir ya ki.

U Shylla da ong u wa da chna ya ka CTCH toh neidaw wa ka KHADC kwah ko wow pynkup bor ya kiwa synchaar chnong, wei da khut ya waroh kiwa synchaar chnong nadooh ki Wahadadar, ki Syiem, ki Sordar, ki Rangbah Shnong wa waroh kiwa synchaar chnong u poi ki cha kani ka yalang wa da pynbait da ka KHADC.

Related posts

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Ha iwi won i liang u CEM da ban u wa ka KHADC ym tipmit ko ya ka Grand Council of Chief (GCC) kawa da khlieh da u John F Kharshiing wei da ong wa man ko ka seiñ samen u John wei ymye u wow pynemkaam da ka ktien Federation of Khasi State (FKS).

“Neini chakhmat ymye de wow pynemkaam ya ka ktien Federation of Khasi State (FKS), lada u John dang pynmih u ya ka Federation of Khasi State daw man ko pyrchah aiñ,” da ong u CEM.

Hawa kylli lada em namo ym em kiwa synchaar chnong kiwa dang yatoh wa ka GCC, neiliang u CEM da ong u wa hadooh katni ymtip iwon iwon hajrong ini.