Da u Chandame Sungoh, Chutwakhu, Jowai.
Khlem poi pyrkhat O ha katu ka sngi,
Yoo O pha heitu ha jan madan Daimasi;
Kam u syntu kulab wada sti wa da tyrjah,
Aah, cheiwon de waroh itu i ak khooid i ak pliah!
Nachwa tæ jlis næ dei jeans wei juti jrong khyndong,
Katni tæ thyrphat næ dei thad sem jæd thaw chong;
Da duk pho ki u silet u yilloop na-ong?
Waroh i tu i ak miat wei leh sarong.
Ya nga uwa rep uwa mylla wa tyrphut,
Kam ya i jhep kyntait pha nga charood;
Kattæ leh dang yaleh O’u khroh u ya bood,
Ha khmat ki paidbah mynthu pha nga “Phuit”.
Wei sula jæd, thop thop lai O dei kjat,
Pha wa ki jliah yingkhoi chong kari standard;
Yoo pho wow wakhu bah O ha tympha,
Na yit kari jngieh tæ rkhai beiñ pha nga.
New York, London, Delhi, Mumbai da poi,
Sah Fivestar Hotel, dih kiad dih beer, enjoy;
I sñiawbha rong pyrthai ya pha wa kyn-oi,
Wym tip pho ki khaddooh ka sngi cheiwon u poi?.
Kam uwa rep uwa mylla du iwi i yumut,
Ha kitu ki por maya ya pha nadooh dohnood;
Pathan kut ki nga kamtu du hei mut dur,
Hawa pait O chapha thij kamwa khmied cha ki khloor!
Dalai ki por ki sngi, da kot u yooluti,
Khaddooh nga leh wym yohsa u thooh chawi;
Haka para wa rep wa para palat-sor,
Hun suk i mynsien O hanlada priñ lada yong.
Hei rta pyrthai yong nga, nga sñiaw O da biang,
Da heh da khroo ki khon O kynthai wa chynrang;
Dei khih chitom wei kyrkhu U Blai ya nga,
Yoh O’u thied kari u chna yung le soo mala.
Pait O cha pha tæ jrup næ wa joo ki umkhmat,
Neibhah wa maya O ya pha dei yong sakhiat;
Sñiaw O i wyrta wa khana ki lok neitu neini,
Katni silet pha nga, kam u klaw ya ka sngi!.
I maya i wyr-ai O ya pha tæ dang neh,
Pathan da dier i por tæ iyi ye O’u leh?
Chisien ka sngi yong wa im pho hei rong pyrthai,
Katni tæ kamtu sæ duk pho u jynjar u khuslai.
Katni da man pho la kam ka yingkhoi wa pai,
Da yoo salia ki bru pha, heithaw wow wyr-ai!
Manda pana leh hi, wym em de wa yarap,
Da man pho ka manbei wa chem pap!
Chibnai chi thaw duk pho u kyrriah yungwai,
Dajan u lut waroh ki yung ha sor Jowai;
I doh i pran pho leh wym em dor de u dai,
Wym ye de pho u su tang kat ka bai yungwai!
Ymtoh wa klam beiñ wa beiñ O næ lok,
Ki khon ki kti pho lakam ki ksaw sarok!
Hai-hai, piah u nood O hawa pait ya ki pli!
U pa wymtip, ki khon uyi ki kini?
Da kut na-ai wa yoo wyr-ai O ya pha,
Ma chah ka laad da ong o sah ha yong nga;
Kat wow yoo wym ye O’u yarap ya pha chi-rta,
Chim tang khajiak ini i e sñiawbha.
I yoobeiñ yoo poh pha nga dang chisien ka sngi,
Lok wa maya, waroh wym kheiñ O ki;
Lada em i bakla O tæ sñiawbha maap ya nga,
Hei manbru boi tæ em i thaw wa bakla.
