U Home Minister ka sorkar India, u Amit Shah hawa lai cha West Bengal, da ong u wa ka aiñ Citizenship Amendment Act (CAA) daw pynkrehkaam noh ya ka manda kut ka khlam COVID-19.
U Amit Shah da ong u wa ka Trinamool Congress (TMC) da pynpoor ko ya ki khubor hamsaya wa ya ka CAA ym pynkrehkaam tangwa da ong u wa ya kani ka aiñ daw pynkrehkaam noh ya ka hadien wa kut ka khlam.
“Ka CAA toh ka yong sakhiat wei ym em kylla iyi iyi leh,” da ong u Shah.
Kani ka aiñ da mynjur da ka Parliament ha u Kmaichonglad (Dec) 2019, heiwa ka CAA da chah ko ya kitu ki wym toh ki Muslim kiwa man kam ki khian paaid ha Pakistan, Bangladesh wa Afghanistan kiwa man kam ki Hindu, Sikh, Jain, Buddhist, Parsi wa Christan wow man ki kam kiwa chong chnong wa pura ka India yow lait ki nei chah thombor ha ki ri yong ki hi. Hapoh kani ka aiñ kini ki bru wa wan cha India chwa ka 31-12-14 ym kheiñ ya ki kam kiwa chong chong pyrchah ya ka aiñ.
Ka West Bengal da man ko kawi na ki jylla wow pynmih ya ka rai (Resolution) wow pyrchah ya ka CAA.
U Shah da pynbaad u leh wa ka Chief Minister ka West Bengal, ka Mamata Banerjee da thang pynyim ko ya 9 ngut ki bru ha Birbhum.
U Shah da ong u, “Ya ka Mamata da jied la le sien da ki bru ka Bengal heiwa i da pyrkhat i wa daw pynbait phi yeini tangwa ym em leh phi”.
U Shah da lai u cha Bengal yow lai e mynsien ya ki wakreh ka Party. Myntu ka sngi daw lai embynta u haka yalang ka BSF ha Three Bigha Corridor ha Cooch Behar. Hei janmiet daw lai u cha Kolkata wei daw yachem u wa ki MLA ka Party wa kiwa yahkhmat ka BJP.
“Hadien boon ki kaam wa da mih ki mynsoo mynsnaam hadien ka Election, ka Human Rights Commission da ong ko wa ym em de krehkaam ka aiñ heini, du i aiñ kiwa synchaar donhi wa em heini. Palat 100 ngut kiwa chah tynyap, 1,829 ngut kiwa da mynsoo heiwa ki bru ka TMC da emkti ki ha ki 161 tylli. Ki wakreh ka BJP ym em tieñ ki, ym em wa ye u khang ya i,” da ong u Shah.
