U montri rangbah ka jylla, u Conrad K. Sangma ynning ka sngi da ong u wa ki khynnah puræ toh u em ki yei sap wei wow chim yei bor kat dang lai ki chaphrang deiwa pynrap wa ki Grade wa i kyrdan puæ yong ki daw yoh kabu chooh ki hadien.
Hawa klam ha ka ‘The ICFAI University’ ha ka IV Convocation Ceremony ha Tura, u montri rangbah da ban joor u hajrong ka yurim wa im u deiwa ong wa oo sdang u da ka thong heiwa da maya u ya u dak P iwa mut Purpose wei Passion wei pyntikna u wa ymtoh u randien u deiwa suk. Da ong u leh wa man u bru uwa da rem boonsien ki bru ymtip ki yeitæ.
Da ong u wa manda rem ymjooh dooh mynsien u tangwa dang pynkhlan chooh chooh i ya oo wei ym jooh randien u deiwa tia bait u chaphrang wei ngooh Blai wei chong ha u Blai yeitæ waroh.
Heiyatoh wa u dak ‘F’ da ong u wa uni u dak ha oo hi samen mut i Fail.
Da ong u wa i por wa sdang da pdiang u yei Fail wei da pynkylla i yei rukom im ki bru waroh wei chong ha-i-dæ kammon pdiang i ki wei kammon u kylla wow lai i chaphrang. Hadien wa pdiang i yei Fail daw ye i u tia chaphrang hei rukom im yong i.
Da ekhublei u leh ya ki 544 ngut ki khynnah kiwa da pyndep yei puræ yong ki hei emlang u Chancellor ka ICFAI University u Lt. Gen. Dr. Arvinder Singh Lamba wa ka Vice Chancellor ka Dr Alicia Gatpoh.
Heijooh i por u Conrad da ong u wa ha ki san snem wa da lai ka India da man ko ka ri wa heh dooh hei wow chna tiar wei man ka ri leh kawa skem ha i khayi pateiñ (stable economy) ha ka pyrthai katni wei chiboon ki ri kiwa lai lyngba i eh i khor tangwa ka India ym chah ktah ko neini.
