15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Mar ya chimkti ya ka kaam pohyung, khut yaklam u Lahkmen ya ka CoMSO

0 Comments

Shillong: U montri ka chnat kaam pohyung ka jylla uwa dang chimkti, u Lahkmen Rymbui mar ya chimkti ya ka kaam da khut yaklam noh u ya ki seiñbhalang kiwa em hapoh ka lama ka Confederation of Meghalaya Social Organisation (CoMSO) mynstep ka sngi ha kamra krehkaam yong oo.

Ini i khut yaklam u montri toh hadien chi sngi wa ka CoMSO da pynkrehkaam ko yaka Inner Line Permit (ILP) yong ka hi deiwa khynra wei sylli ya kiwa na baar wa psiah cha kani ka jylla.

Hawa klam ynne ka sngi wa ki laad pathai khubor, u Rymbui da pyntip u wa da khut u ya kiwa yahkhmat ka CoMSO wow yaklam mynstep wei da pyntip u leh wa daw khut leh ya kiwi ki seiñbhalang yow tip yei eh yong ki. Katkam i ong u montri, hawa kut hi, lada toh da ka sorkar næ ki seiñbhalang, man ki ki jooh kiwa chong chnong ka jylla, tangwa em won ki jar jiar ki kaam wow pyndep.

Da pynrap u wa iwon iwon i eh ye wow yaklam yow pynbait lyngba i ya phyllu yumut lang.

Ha kawi ka liang, u Rymbui da kyntu u ya ki seiñbhalang wow yaichah hawa yatoh wa i dawa Inner Liner Permit (ILP) wei wow e laad ya ka sorkar wow leh ko ya i bynta yong ka.

Hawa kylli hajrong i yakhih ki seiñbhalang wow dawa ILP, da ong u wa ym mut wa iwa leh ki seiñbhalang man i iwa sih, tangwa toh u pyrkhat leh wa ha kam kini ki por wa em Exam ki khynnah yow lait ki neiwon neiwon i pynthut.

Ha i jooh i por da kyntu u leh ya ki laad pathai khubor wow yait nei pynmih næ pynpoor ya ki khubor kiwa thok wa khlem yurim neibhah daw yahbakla ko yei chongsuk chongsaiñ.

Ki kaam pyrchah aiñ ym toh u yohlaad

U Lahkmen Rymbui da ong u wa ki kaam pyrchah aiñ ym toh u yohlaad ki ha ka jylla wei ki bor pulit, ki bor synchaar District toh u pait ki ya ini wei toh u pyndooh nadooh wa sdang.

Hawa pynsñiaw yei challan tooh ya u mooyong, da ong u wa ym kwah u wow klam iyi iyi leh hajrong ki kaam pynbaad challan mooyong pyrchah yaka aiñ tangwa da ong u wa kiwon kiwon ki kaam pyrchah aiñ ym toh wow e laad wei toh u pyrchang wow pyndooh.

Da ong u wa ym kwah u wow pait ya iwa chadien tangwa u pait ya iwa chakhmat. Da ong u wa kawon kawon kawa leh toh u man ko katkam ka aiñ wei da kyrpaad u ya ki paidbah wow e yutip wei wow ya krehlang wa ki bor ka aiñ lada em ki kaam pyrchah aiñ.

Ha i jooh i por, hawa yatoh wa i chah hiar thma ki bru ha ki damok na Bangladesh ha khappood, da ong u wa emkaam i ya krehlang hapyrdi ki pulit ka jylla wa ki chipai BSF yow kdoh u khoom ya ki kaam wym man. Da ong wa toh u pyntikna wa ki paidbah ha khappood toh u chong chngaiñ ki. U montri da ong u wa daw khut u ya ki heh pulit ha kini ki sngi yow bichaar bniah ya i long i man ha ka jylla.

Hajrong wa da pynkit yaka chnat pohyung ha oo, u Lahkmen da ong u wa pdiang sñiawbha u wow chimkti neibhah man ko ka laad wow yoh ya i chemphang wa ka yutip wei kamjooh leh ya kiwi ki para montri sorkar.

Kwah pynyajan u montri kaam pohyung ya ki pulit wa ki paidbah

U Lahkmen Rymbui da pynsñiaw u wa kwah u wa ka chnat pulit wa ki paidbah toh wow em ki ka yajan wa ka ya krehlang khnang wow tem ya ki kaam sih wei wow pynneh ya ka chongsuk chongsaiñ.

Da ong u wa i kaam yong ka chnat pulit toh wow pait wa em ka chongsuk chongsaiñ hapoh ka jylla wei kawa kongsan toh wow em ka yajan hapyrdi ki pulit wa ki paidbah ha kawon kawon ka kaam yow yoh ya ka chongsuk chongsaiñ.

Share this:
Previous

Khlaad noh ka kong Mili Toi

Next

Yoh takma ksiar sa u Pynshrain Miki Rabon haka WAKO Indian Open International Kickboxing Tournament 2020