U Speaker ka Meghalaya Legislative Assembly, u Thomas A. Sangma, ynne da khut pynman u ya ka yalang ha Conference Room ka Assembly Secretariat, Khyndailad yow booddien yei chna ya ka Assembly Building wa thymme ha Mawdiangdiang.
Ha kani ka yalang da klam yei chem chitom i chna pyndep wei kammon wow leh yow ye u pyndep yei kreh heipor wa biang.
U Speaker hadien da yalang da ong u wa da chim yei rai wa emkaam yow pyntikna wa pyndep yei kreh heipor wa biang khlem da ktah yei chna iwa deiwa miat wa bha wei iwa skem.
Da ong u wa i chna ya kani ka yung dorbar chna aiñ wa thymme toh kawa em boon ki jait nadooh wow pyntikna wa man ko kawa chngaaiñ, i pyndait ya ki tanghæng, ki Screen, i miat i rukom sawa i sur, i pynriam pynmiat, i siang Carpet kiwa da leh da jar jiar ki bru wei da emkaam wow pyntikna wa ya krehlang ki wei da ya mynjur ki wow leh yeini deiwa pynbiang yei yaklam para ki.
Hawa kylli lada daw ye u pyndep heipor wa da booh, u Speaker da ong u wa i kreh da lai i kamwa da booh thong tangwa kattæ leh ye wow em i thut heini heitai.
“Hap i wow pyntikna bha wym mih iyi iyi tangwa ye wow mih ki kynjnit kynjnat wei kattæ iwa hakhmat toh wow pyntikna wa man chngaaiñ wei kammon i rukom sawa i sur hapoh neibhah da chem wa ynne heipor wa hiar u slap wa chibet donhi da ood bha i tnoom hadooh wa sñiaw chapoh wei kam ini ymtoh wow jia wei hap wow pynbait yeini waroh deiwa khut da ki bru wa chemphang kiwa tip kammon u leh,” da ong u Speaker.
Da pyntip u leh wa da phah ya kiwa kreh wow bhah ki yei kreh le sien ha chi sngi deiwa kreh khlem sangeh tangwa ymtoh won wow leh khalær, wei i kreh ye wow chimpor sa 6-8 bnai u pyndep.
Heiyatoh won i lut i step, da pyntip wa neh ko kat jooh kamwa da mang tangka deiwa pynrap wa ye wow ku palat yeiwa da mang tangwa ka thong toh wow pyndep katkam wa da mang hi.
Discussion about this post